

బెంగళూరులోని యలహంక ప్యాలెస్లోకి వైఎస్ షర్మిల, ఆమెకు సంబంధించిన వ్యక్తులు ప్రవేశించకుండా దేవనహళ్లి సీనియర్ సివిల్, జేఎంఎఫ్సీ కోర్టు మధ్యంతర ఉత్తర్వులు జారీ చేసింది. వైఎస్సార్సీపీ అధినేత వైఎస్ జగన్మోహన్రెడ్డికి సంబంధించిన ఈ ఆస్తి విషయంలో సిలికాన్ బిల్డర్స్ ప్రైవేట్ లిమిటెడ్ సంస్థ తరఫున కోర్టులో పిటిషన్ దాఖలైంది. ప్యాలెస్లోని గెస్ట్హౌస్లో తాత్కాలికంగా ఉండేందుకు గతంలో అనుమతి పొందిన షర్మిల, ప్రస్తుతం అలంకరణ పనుల పేరుతో బయటి వ్యక్తులను లోపలికి తీసుకువస్తున్నారని పిటిషనర్ ఆరోపించారు. దీనివల్ల ప్యాలెస్లోని నిర్మాణాలు, ఫెన్సింగ్, పండ్ల చెట్లు, ఇతర ఆస్తులకు నష్టం వాటిల్లే ప్రమాదం ఉందని పేర్కొన్నారు. ఈ వాదనలను పరిగణనలోకి తీసుకున్న న్యాయస్థానం తదుపరి విచారణ వరకు షర్మిల, ఆమెకు సంబంధించిన వ్యక్తులు ప్యాలెస్లోకి ప్రవేశించకుండా ఆదేశించింది.
షర్మిల కుమార్తె అంజలి రెడ్డి వివాహాన్ని యలహంక ప్యాలెస్లో నిర్వహించాలని తొలుత నిర్ణయించగా, అక్కడ పెళ్లి నిర్వహించేందుకు జగన్ అభ్యంతరం వ్యక్తం చేసినట్లు కథనంలో పేర్కొన్నారు. భద్రతా కారణాల దృష్ట్యా తన నివాస ప్రాంగణంలో వివాహ వేడుక నిర్వహించడం సాధ్యం కాదని జగన్ గతంలో షర్మిలకు లేఖ రాసినట్లు సమాచారం. దీంతో వివాహ వేదికను మరోచోటికి మార్చిన షర్మిల, పెళ్లి పనుల నిమిత్తం ప్యాలెస్కు వెళ్లేందుకు ప్రయత్నించినట్లు తెలుస్తోంది. ఈ నేపథ్యంలో సిలికాన్ బిల్డర్స్ ప్రతినిధి భీమిశెట్టి రమేష్బాబు కోర్టును ఆశ్రయించారు. 2007లో 20 ఏళ్ల కాలానికి ప్యాలెస్ను తమ సంస్థకు లీజుకు ఇచ్చారని, అభివృద్ధి పనుల కోసం భారీగా ఖర్చు చేసినట్లు పిటిషనర్ తరఫు న్యాయవాది వాదించారు. 2026 ఆగస్టులో ఆస్తిని భారతి, ఆమె మనుమరాళ్లకు గిఫ్ట్ డీడ్ ద్వారా బదిలీ చేసినట్లు కోర్టుకు వివరించారు. పిటిషనర్ వాదనలు, సమర్పించిన ఆధారాల ప్రకారం ఆస్తి వారి స్వాధీనంలో ఉన్నట్లు ప్రాథమికంగా కనిపిస్తోందని న్యాయస్థానం అభిప్రాయపడింది. తదుపరి విచారణను డిసెంబర్ 19కి వాయిదా వేసింది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!