మున్సిపల్ ఎన్నికలపై సీఎం రేవంత్ జూమ్ సమావేశం, జిల్లాల పర్యటనకు సిద్ధం

రాబోయే మున్సిపల్ ఎన్నికలపై తెలంగాణ ముఖ్యమంత్రి రేవంత్ రెడ్డి నేడు జూమ్ సమావేశం నిర్వహించనున్నారు. ఈ సమావేశంలో టీపీసీసీ చీఫ్ మహేష్ గౌడ్‌తో పాటు ఏఐసీసీ ఇన్‌చార్జ్ మీనాక్షి నటరాజన్, డిప్యూటీ సీఎం భట్టి విక్రమార్క, పలువురు మంత్రులు పాల్గొననున్నారు. ఎన్నికల వ్యూహం, పార్టీ సమన్వయం, ప్రచార ప్రణాళికలపై ఈ సమావేశంలో కీలక చర్చ జరగనుందని సమాచారం.

మున్సిపల్ ఎన్నికల నేపథ్యంలో సీఎం రేవంత్ ఈ నెల 4 నుంచి 8 వరకు జిల్లాల పర్యటన చేపట్టనున్నారు. ఈ పర్యటనలో భాగంగా పలు నియోజకవర్గాల్లో జరిగే ఎన్నికల సభల్లో ఆయన పాల్గొని ప్రజలను ఉద్దేశించి ప్రసంగించనున్నారు. స్థానిక సంస్థల ఎన్నికలను అత్యంత ప్రతిష్టాత్మకంగా తీసుకున్న కాంగ్రెస్ పార్టీ, గెలుపే లక్ష్యంగా ప్రచారాన్ని ముమ్మరం చేస్తోంది.