అజిత్ పవార్ మృతికి సంతాపం తెలిపిన ఏపీ క్యాబినెట్

విమాన ప్రమాదంలో మహారాష్ట్ర ఉప ముఖ్యమంత్రి అజిత్ పవార్ మృతిపై ఆంధ్రప్రదేశ్ క్యాబినెట్ తీవ్ర సంతాపం వ్యక్తం చేసింది. క్యాబినెట్ సమావేశం ప్రారంభ సమయంలో ఈ ఘటనను ముఖ్యమంత్రి చంద్రబాబు నాయుడు ప్రస్తావిస్తూ, ముంబై నుంచి బారామతి వెళ్తుండగా జరిగిన ప్రమాదంలో అజిత్ పవార్‌తో పాటు ఐదుగురు మృతి చెందడం పట్ల దిగ్భ్రాంతి వ్యక్తం చేశారు. ఈ దుర్ఘటన రాష్ట్ర రాజకీయ వర్గాలను కలచివేసిందని క్యాబినెట్ సభ్యులు పేర్కొన్నారు.

అజిత్ పవార్‌తో తనకు ఉన్న పరిచయాన్ని గుర్తు చేసుకున్న ముఖ్యమంత్రి చంద్రబాబు నాయుడు, ఈ ఘటన తనను వ్యక్తిగతంగా బాధించిందన్నారు. మహారాష్ట్ర రాజకీయాల్లో అజిత్ పవార్ మృతి తీరని లోటని వ్యాఖ్యానించారు. మహారాష్ట్ర ఉప ముఖ్యమంత్రి మృతికి సంతాపం తెలుపుతూ ఏపీ క్యాబినెట్ ప్రత్యేక తీర్మానం ఆమోదించి, మృతులకు నివాళులు అర్పించింది.