ఓటీటీలోకి ‘ఎల్‌ఐకే’...

ప్రదీప్ రంగనాథన్ హీరోగా తెరకెక్కిన ‘ఎల్‌ఐకే - లవ్ ఇన్సూరెన్స్ కంపెనీ’ సినిమా ఇప్పుడు ఓటీటీ ప్రేక్షకుల ముందుకు రానుంది. ఏప్రిల్‌లో థియేటర్లలో విడుదలైన ఈ చిత్రం, ఈ నెల 6 నుంచి ప్రముఖ డిజిటల్ వేదిక అమెజాన్ ప్రైమ్ వీడియోలో స్ట్రీమింగ్ కానుంది. ఈ విషయాన్ని అధికారికంగా ప్రకటిస్తూ పోస్టర్‌ను విడుదల చేశారు. ఈ సినిమాలో తెలుగు ఆడియో కూడా అందుబాటులో ఉండటం విశేషం. దర్శకుడు విఘ్నేశ్ శివన్ ఫ్యూచరిస్టిక్ లవ్ స్టోరీని తనదైన కామెడీ టచ్‌తో ఆకట్టుకునేలా రూపొందించారు. ప్రదీప్ సరసన కృతిశెట్టి హీరోయిన్‌గా నటించగా, ఎస్.జె. సూర్య విలన్ పాత్రలో కనిపించారు.

ఈ సినిమా కథ 2040 సంవత్సరంలో సాగే భవిష్యత్ నేపథ్యంలో ఉంటుంది. ప్రేమ విఫలమైతే బీమా ఇచ్చే విధంగా ‘లవ్ ఇన్సూరెన్స్ కంపెనీ’ అనే సంస్థను స్థాపించే పాత్రలో ఎస్.జె. సూర్య కనిపిస్తారు. యువతను ఆకర్షించేలా ప్రత్యేక యాప్‌ను రూపొందించి, దాని ద్వారా సంబంధాలు ఏర్పడే విధంగా కథను నడిపించారు. కృతిశెట్టి పోషించిన దీమా అనే యువతి కూడా ఈ యాప్ ద్వారా తనకు సరైన భాగస్వామిని వెతుక్కుంటుంది.

ఇక ఫోన్ వాడకానికి దూరంగా ఉండే వాసు అనే యువకుడు దీమాను ప్రేమిస్తాడు. ఆమె కోసం యాప్‌లో చేరి దగ్గరవుతాడు. కానీ యాప్ ఇచ్చిన లవ్ స్కోర్ తక్కువగా ఉండటంతో ఆమె బ్రేకప్ చెబుతుంది. ఆ తర్వాత వాసు తన ప్రేమను ఎలా తిరిగి పొందాడు? ఈ సమస్యకు కారణమైన వ్యక్తిపై ఎలా ప్రతీకారం తీర్చుకున్నాడు? అన్నది కథలో ప్రధాన అంశంగా ఉంటుంది.