కుమార్తెను గుర్తుచేసుకుని సింగర్ చిత్ర భావోద్వేగ పోస్ట్...

ప్రఖ్యాత నేపథ్య గాయని కే.ఎస్. చిత్ర తన దివంగత కుమార్తె నందనను గుర్తుచేసుకుంటూ సోషల్ మీడియాలో చేసిన భావోద్వేగ పోస్ట్ అభిమానులను కదిలిస్తోంది. కుమార్తె అందమైన ఫోటోను పంచుకుంటూ, “నువ్వు ఇప్పుడు మాతో లేవన్న వాస్తవం ఎప్పటికీ బాధ కలిగిస్తుంది. మళ్లీ కలిసేంత వరకు నువ్వు ఎప్పటికీ నా హృదయంలోనే ఉంటావు” అంటూ ఆమె తన భావాలను వ్యక్తం చేశారు. సంవత్సరాలు గడిచినా ఆ బాధ తగ్గలేదని ఈ పోస్టు ద్వారా స్పష్టం చేశారు.

2002లో జన్మించిన నందన, చిత్ర మరియు ఆమె భర్త విజయ్ శంకర్కు ఏకైక సంతానం. అయితే 2011లో దుబాయ్‌లో జరిగిన ఈత కొలను ప్రమాదంలో చిన్న వయసులోనే ఆమె మరణించింది. ఈ విషాదం తర్వాత కూడా చిత్ర తన సంగీత ప్రయాణాన్ని కొనసాగిస్తూ నాలుగు దశాబ్దాలకు పైగా కెరీర్‌లో 25,000కు పైగా పాటలు పాడారు. ‘దక్షిణ భారత నైటింగేల్’గా పేరుపొందిన ఆమె పద్మభూషణ్‌తో పాటు అనేక జాతీయ అవార్డులు అందుకున్నారు.