రామోజీ ఎక్సలెన్స్ అవార్డ్స్ 2025: సమాజానికి సేవ చేసిన ఏడుగురికి గౌరవం

హైదరాబాద్‌లో రామోజీ ఎక్స్‌లెన్స్ అవార్డ్స్ 2025 కార్యక్రమం అత్యంత భవ్యంగా జరిగింది. రామోజీ గ్రూప్ వ్యవస్థాపకుడు రామోజీరావు జయంతి సందర్భంగా వివిధ రంగాల్లో సేవలందిస్తున్న ఏడుగురు వ్యక్తులకు ఈ అవార్డులను ప్రదానం చేశారు. సమాజహితం కోసం తమదైన శైలిలో కృషి చేస్తున్న ప్రతిభావంతులను గుర్తించి సత్కరించడం ఈ కార్యక్రమం ప్రధాన లక్ష్యం.

ఈ ఏడాది అవార్డు గ్రహీతల్లో గ్రామీణాభివృద్ధి విభాగంలో అమలా రూయియా, యూత్ ఐకాన్‌గా శ్రీకాంత్ బొల్లా, సైన్స్ అండ్ టెక్నాలజీ విభాగంలో గాలి మాధవీలత, మానవసేవలో ఆకాశ్ టాండన్, కళ–సంస్కృతిలో సాతుపాటి ప్రసన్న శ్రీ, జర్నలిజం విభాగంలో జైదీప్ హార్దికర్, మహిళా సాధికారతలో పల్లవి ఘోష్ ఉన్నారు. ఈ కార్యక్రమానికి ఉప రాష్ట్రపతి, రెండు తెలుగు రాష్ట్రాల ముఖ్యమంత్రులు సహా పలువురు ప్రముఖులు హాజరయ్యారు.

తీవ్ర కరవుతో బాధపడుతున్న ప్రాంతాల్లో నీటి సమస్యల్ని పరిష్కరించేందుకు వేలాది చెక్‌డ్యామ్‌లు నిర్మించి లక్షలాది ప్రజలకు ఆశగా నిలిచింది అమలా రూయియా. వర్షపు నీటిని నిల్వ చేసి భూగర్భ జలాలను పునరుద్ధరించేందుకు ఆమె చేసిన కృషి అనేక గ్రామాల్లో జీవన ప్రమాణాలను మార్చింది. అందుకే ఆమెను ప్రజలు ప్రేమగా ‘వాటర్ మదర్ ఆఫ్ ఇండియా’ అని పిలుస్తారు.

చిన్నప్పటినుంచే వైకల్యంతో బాధపడినా చదువుపై దిగదుడుపు లేకుండా ముందుకు సాగిన శ్రీకాంత్ బొల్లా, MITలో బ్రెయిన్ కాగ్నిటివ్ సైన్స్‌లో చదివిన తొలి దివ్యాంగుడిగా గుర్తింపు తెచ్చుకున్నారు. ప్రపంచస్థాయి ఉద్యోగ అవకాశాలను తిరస్కరించి ‘బొల్లాంట్ ఇండస్ట్రీస్’ను స్థాపించడం ద్వారా వేలాది దివ్యాంగులకు ఉపాధి కల్పిస్తూ స్ఫూర్తిగా నిలుస్తున్నారు.

చినాబ్ నదిపై నిర్మించిన ప్రపంచ ప్రసిద్ధ రైల్వే ఆర్చ్ వంతెన ప్రాజెక్టుకు 17 ఏళ్ల పాటు కన్సల్టెంట్‌గా పనిచేసిన గాలి మాధవీలత, అనేక సవాళ్లను ఎదుర్కొని ఈ ఇంజినీరింగ్ అద్భుతాన్ని సాధ్యంచేశారు. ప్రభుత్వ పాఠశాలల్లో చదివిన సాధారణ విద్యార్థిగా ప్రారంభమైన ఆమె ప్రయాణం దేశ గర్వంగా మారింది.

చిన్నప్పుడే ఎదుర్కొన్న ఆర్థిక కష్టాలు తనలాంటి పిల్లలకు రాకూడదన్న సంకల్పంతో ఆకాశ్ టాండన్ ‘పెహచాన్ – ది స్ట్రీట్ స్కూల్’ను స్థాపించారు. ఇప్పుడు పది కేంద్రాల్లో 1,600 మంది పిల్లలకు ఉచిత విద్య అందిస్తూ అనేక కుటుంబాల భవిష్యత్తు మారుస్తున్నారు.

ఆదివాసీ భాషలు, సంస్కృతిపై దశాబ్దాలుగా పరిశోధనలు చేస్తూ 19 గిరిజన భాషలకు అక్షరాలు సృష్టించిన సాతుపాటి ప్రసన్న శ్రీ, మహిళల అభివృద్ధికి అంకితభావంతో పనిచేస్తూ అకాడమిక్ రంగంలో విశేష సేవలందించారు. ఇందుకు అనేక జాతీయ, అంతర్జాతీయ గుర్తింపులు పొందారు.

వ్యవసాయ సంక్షోభం, రైతుల ఆత్మహత్యలు వంటి సమస్యలను మీడియాలో విస్తృతంగా ప్రస్తావించి దేశ దృష్టిని గ్రామీణ భారతావనిపై నిలిపిన పాత్రికేయుడు జైదీప్ హార్దికర్ జర్నలిజం విభాగంలో అవార్డు పొందారు. తన కలంతో రైతుల సమస్యలకు పరిష్కారం తీసుకురావడానికి కృషి చేశారు.

మానవ అక్రమ రవాణా నుంచి వేలాది అమ్మాయిలను రక్షించిన పల్లవి ఘోష్, ‘ఇంపాక్ట్ అండ్ డైలాగ్’ సంస్థ ద్వారా పిల్లలకు సహాయం చేయడానికి, వారి హక్కులను కాపాడడానికి రోజువారీగా పోరాటం చేస్తున్నారు. బెదిరింపులు ఎదురైనా వెనక్కి తగ్గకుండా సేవ చేస్తూ అనేక కుటుంబాల్లో వెలుగులు నింపుతున్నారు.