గద్దర్ అవార్డ్స్... చిరంజీవి స్పీచ్ పై విమర్శలు

హైటెక్ సిటీలో ఘనంగా నిర్వహించిన “తెలంగాణ గద్దర్ సినీ అవార్డ్స్” కార్యక్రమం అంగరంగ వైభవంగా జరిగింది. ఈ వేడుకలో మెగాస్టార్ చిరంజీవి ప్రముఖమైన ‘ఎన్టీఆర్ నేషనల్ ఫిల్మ్ అవార్డు’ ను ముఖ్యమంత్రి రేవంత్ రెడ్డి చేతుల మీదుగా అందుకున్నారు. ఈ సందర్భంగా మాట్లాడిన చిరంజీవి, సినిమా రంగాన్ని ప్రోత్సహించడంలో తెలంగాణతో పోలిస్తే ఆంధ్రప్రదేశ్ కొంత వెనకబడి ఉందని అన్నారు. అలాగే చంద్రబాబు నాయుడు నేతృత్వంలోని ప్రభుత్వం ఈ అవార్డులను ఆదర్శంగా తీసుకొని కళాకారులను మరింత ప్రోత్సహించాలని సూచించారు.

అయితే, ఈ వ్యాఖ్యలపై సోషల్ మీడియాలో విమర్శలు వెల్లువెత్తాయి. చాలా మంది నెటిజన్స్ సినిమా వాళ్లు ఆంధ్రప్రదేశ్‌లో షూటింగ్‌లు చేయకపోవడం, పరిశ్రమ అభివృద్ధికి ముందుకు రాకపోవడం, టికెట్ ధరలు పెంచుకునే సమయంలో మాత్రమే ప్రభుత్వాన్ని ఆశ్రయించడం గురించి ప్రస్తావించారు. అలాగే గతంలో తెలంగాణలో అవార్డులు నిలిచిపోయినప్పుడు ఇలాంటి వ్యాఖ్యలు చేయలేదని కూడా గుర్తుచేశారు. మరోవైపు, ఆంధ్రప్రదేశ్ ప్రభుత్వం టికెట్ ధరల పెంపు వంటి విషయాల్లో త్వరగా అనుమతులు ఇస్తుందని, కానీ తెలంగాణలో అలాంటి పరిస్థితి ఉండదని కొందరు అభిప్రాయపడ్డారు. ఈ కారణాలతో చిరంజీవి వ్యాఖ్యలు సరైనవి కావని కొందరు విమర్శిస్తూ సోషల్ మీడియాలో ట్రోల్స్ చేస్తున్నారు.