IPL 2026: తొక్కిసలాట మృతులకు ఆర్సీబీ ఘన నివాళి

ఇండియన్ ప్రీమియర్ లీగ్ 2026 ప్రారంభానికి ముందు రాయల్ ఛాలెంజర్స్ బెంగళూరు జట్టు ఇచ్చిన హామీని ఈ రోజు (మార్చి 28) నిలబెట్టుకుంది. 2025 జూన్ 4న ఆర్సీబీ విజయోత్సవ వేడుకల సమయంలో జరిగిన తొక్కిసలాట ఘటనలో ప్రాణాలు కోల్పోయిన 11 మంది అభిమానులకు కర్ణాటక స్టేట్ క్రికెట్ అసోసియేషన్ (KSCA) ఘన నివాళి అర్పించింది. వారి జ్ఞాపకార్థం చిన్నస్వామి మైదానం ప్రవేశ ద్వారం వద్ద ప్రత్యేకంగా ఒక మెమోరియల్‌ను ఏర్పాటు చేశారు. ఈ విషాద ఘటనను స్మరించుకుంటూ ఈరోజు జరిగిన మ్యాచ్‌లో ఆర్సీబీ ఆటగాళ్లు నల్ల బ్యాండ్లు ధరించి మైదానంలోకి దిగారు.

ఆ 11 మంది అభిమానులు జట్టుపై చూపిన అపారమైన ప్రేమను గుర్తుచేసుకుంటూ రాయల్ ఛాలెంజర్స్ బెంగళూరు ఫ్రాంచైజీ కీలక నిర్ణయాలు తీసుకుంది. ఈ సీజన్‌లో ఆర్సీబీ ఆడే ప్రతి మ్యాచ్‌లో కూడా స్టేడియంలో 11 సీట్లను ఖాళీగా ఉంచాలని జట్టు మేనేజ్మెంట్ నిర్ణయించింది. అంతేకాకుండా, ఇటీవల జరిగిన ప్రాక్టీస్ సెషన్లలో ఆటగాళ్లు 11వ నంబర్ జెర్సీలను ధరించి తమ సానుభూతిని వ్యక్తం చేశారు.

మైదానంలో ఉన్న ఆటగాళ్లే కాకుండా, అభిమానులు కూడా పెద్ద సంఖ్యలో స్టేడియం వద్ద ఏర్పాటు చేసిన మెమోరియల్‌ను సందర్శించి ఆ 11 మంది మృతులకు నివాళులు అర్పించారు. ఈ చర్యల ద్వారా రాయల్ ఛాలెంజర్స్ బెంగళూరు జట్టు తన అభిమానుల పట్ల ఉన్న గౌరవం మరియు బాధ్యతను స్పష్టంగా చాటుకుంది. 2026 సీజన్ తొలి మ్యాచ్‌లో బెంగళూరు వేదికగా సన్‌రైజర్స్ హైదరాబాద్ జట్టుతో ఆర్సీబీ తలపడనుంది.