మహిళా రిజర్వేషన్ బిల్లుకు కేంద్రం సన్నాహాలు

లోక్‌సభ ఎన్నికల నాటికి మహిళలకు 33 శాతం రిజర్వేషన్ అమలు చేయాలని కేంద్ర ప్రభుత్వం వేగంగా చర్యలు తీసుకుంటోంది. ఈ క్రమంలో ప్రస్తుత పార్లమెంటు సమావేశాల్లోనే రెండు కీలక బిల్లులను ప్రవేశపెట్టే అవకాశం ఉంది. ఈ ప్రతిపాదన అమలైతే లోక్‌సభ స్థానాల సంఖ్య 543 నుంచి 816 కు పెరిగి, అందులో సుమారు 273 స్థానాలు మహిళలకు కేటాయించే అవకాశం ఉంది. ఈ అంశంపై ఏకాభిప్రాయం కోసం కేంద్ర హోం మంత్రి అమిత్ షా ఎన్డీఏ మరియు కాంగ్రెసేతర ప్రతిపక్ష నాయకులతో సమావేశమయ్యారు.

మహిళా రిజర్వేషన్ చట్టం 2023 లో రాజ్యాంగ సవరణగా ఆమోదం పొందినప్పటికీ, దాని అమలు కొత్త జనగణనపై ఆధారపడి ఉంది. అయితే ఆలస్యం నివారించేందుకు 2011 జనగణన ఆధారంగా నియోజకవర్గాల పునర్విభజన చేపట్టాలని కేంద్రం భావిస్తోంది. ఈ ప్రక్రియను వేగవంతం చేయడానికి ప్రస్తుత చట్టం మరియు పునర్విభజన విధానంలో మార్పులు చేయాలని ప్రభుత్వం యోచిస్తోంది. అయితే ఈ బిల్లులు ఆమోదం పొందాలంటే పార్లమెంటులో మూడింట రెండు వంతుల మెజారిటీ అవసరం ఉండటంతో, ప్రతిపక్షాల మద్దతు కీలకంగా మారింది.