దొమ్మేటి వెంకటరెడ్డి జయంతి రాష్ట్ర పండుగగా గుర్తింపు.. జీఓ జారీ!

ప్రముఖ సంఘ సంస్కర్త దొమ్మేటి వెంకటరెడ్డి జయంతిని రాష్ట్ర పండుగగా గుర్తిస్తూ ఆంధ్రప్రదేశ్ ప్రభుత్వం అధికారికంగా ఉత్తర్వులు జారీ చేసింది. యువగళం పాదయాత్రలో ఇచ్చిన హామీని నెరవేర్చుతూ మంత్రి నారా లోకేష్ ఈ నిర్ణయాన్ని అమలు చేశారు. ప్రతి సంవత్సరం మార్చి 23న దొమ్మేటి వెంకటరెడ్డి జయంతిని రాష్ట్ర పండుగగా నిర్వహించాలని అన్ని ప్రభుత్వ విభాగాలకు ఆదేశాలు జారీ చేశారు. శెట్టిబలిజ సమాజ అభివృద్ధికి ఆయన చేసిన సేవలు విశేషమైనవి.

1853 మార్చి 23న వ్యవసాయ కుటుంబంలో జన్మించిన వెంకటరెడ్డి గారు అమలాపురంలో విద్యాభ్యాసం చేసి, తరువాత బర్మాలో విజయవంతమైన వ్యాపారిగా ఎదిగారు. 1905లో శెట్టిబలిజ సంక్షేమ సంఘాన్ని స్థాపించి సమాజంలో విద్య, ఐక్యత, గౌరవం పెంపొందించారు. అమలాపురంలో ఆయన పేరిట కల్యాణ మండపం, రాజమహేంద్రవరంలో విగ్రహం వంటి గుర్తింపులు ఆయన సేవలకు నిదర్శనం. సమాజ అభ్యున్నతికి ఆయన చేసిన కృషిని గుర్తిస్తూ రాష్ట్ర ప్రభుత్వం ఈ నిర్ణయం తీసుకుంది.