హైదరాబాద్‌లో ప్రమాదకర స్థాయికి చేరిన గాలి కాలుష్యం

హైదరాబాద్‌లో గాలి నాణ్యత మళ్లీ ప్రమాదకర స్థాయికి చేరింది. పొగమంచు, చెత్తాచెదారం దహనం, వాహనాల నుంచి వెలువడుతున్న పొగ కారణంగా నగరంలో కాలుష్యం పెరుగుతోంది. సాధారణంగా డబుల్ డిజిట్‌లో ఉండే ఎయిర్ క్వాలిటీ ఇండెక్స్, బాలాపూర్ ప్రాంతంలో శనివారం తెల్లవారుజామున 254కు చేరింది. గత వారం కొంత మేర మెరుగుపడిన గాలి నాణ్యత, ఇప్పుడు మళ్లీ ఆందోళనకర స్థాయికి చేరిందని అధికారులు తెలిపారు.

శ్వాసకోశ వ్యాధులు, సైనసైటిస్ వంటి సమస్యలు ఉన్నవారు ప్రత్యేక జాగ్రత్తలు తీసుకోవాలని వైద్యులు సూచిస్తున్నారు. బయటకు వెళ్లేటప్పుడు వీలైనంత వరకు మాస్కులు ధరించాలని, కాలుష్యం ఎక్కువగా ఉన్న ప్రాంతాల్లో అనవసరంగా తిరగకూడదని సూచనలు చేస్తున్నారు. నగరవాసులు కూడా స్వచ్ఛందంగా కాలుష్య నియంత్రణకు సహకరించాలని నిపుణులు కోరుతున్నారు.