అరెస్ట్‌కు ముందు రవి పౌరసత్వం మార్చుకోవాలని ఎందుకు చూశాడు ?

ఇటీవల అరెస్టైన iBomma అడ్మిన్ ఇమ్మడి రవి ఘటన తెలుగు రాష్ట్రాల్లో పెద్ద చర్చనీయాంశంగా మారింది. రవి వ్యక్తిగత జీవితంపై షాకింగ్ విషయాలు వెలుగుచూస్తున్నాయి. 2016 లో జరిగిన ఇంటర్-రిలీజియన్ వివాహం తర్వాత, తక్కువ ఆదాయం కారణంగా భార్య మరియు అత్తమామల చేత నిరంతరం అవమానం, దూషణలను ఎదుర్కొన్నట్టు నివేదికలు చెబుతున్నాయి. డొమైన్ సర్వీసులు, సర్వర్ మేనేజ్‌మెంట్, వెబ్‌సైట్ డెవలప్మెంట్ వంటి పనుల ద్వారా నిజాయితీగా సంపాదించుకునే రవి, ఈ నిరంతర అవమానాల వల్ల తన ఆత్మవిశ్వాసాన్ని కోల్పోయి విడాకులు తీసుకునే దిశగా వెళ్లాడని సమాచారం. ఈ మానసిక ఒత్తిడి అతన్ని త్వరగా డబ్బు సంపాదించాలనే ఆలోచన వైపు నడిపి, చివరకు సినిమాల పైరసీ ప్రపంచంలోకి నెట్టేసిందని చెబుతున్నారు. అంతేకాదు, నేర ప్రపంచంలో పూర్తిగా అడుగుపెట్టిన రవి, భారత పాస్‌పోర్ట్‌ను రద్దు చేసుకుని, సెయింట్ కిట్స్ అండ్ నెవిస్ పౌరసత్వానికి కూడా దరఖాస్తు చేసుకున్నాడు.

ఈ కథ మరో నిందితుడు అశ్వనీ కుమార్ పరిస్థితిని కూడా గుర్తుకు తెస్తోంది. శారీరక రూపం, స్క్వింట్ ఐ కారణంగా నిరంతరం వేధింపులకు గురైన అశ్వనీ, చదువు మానేసి, యూట్యూబ్ ట్యుటోరియల్స్ ద్వారా హ్యాకింగ్ నేర్చుకుని, తరువాత QUBE, UFO వంటి డిజిటల్ డిస్ట్రిబ్యూషన్ నెట్‌వర్క్‌లను హాక్ చేసి సినిమాలను పైరసీ చేసిన కేసులో అరెస్టయ్యాడు. రవి మాత్రం ఇండియాకు వచ్చి ఆస్తులను లిక్విడేట్ చేసే ప్రయత్నంలో ఉన్న సమయంలో నాటకీయంగా అరెస్ట్ అయ్యాడు. అతని ఖాతాల్లో రూ. 20 కోట్లు ఉన్నట్లు పోలీసులు గుర్తించగా, అరెస్టు సమయంలో రూ. 3.5 కోట్లు స్వాధీనం చేసుకున్నారు. బ్యాంక్ ఖాతాలను ఫ్రీజ్ చేసి, అతని వద్ద లభించిన క్రెడిట్ కార్డులు, డెబిట్ కార్డులు, చెక్‌బుక్స్ ఆధారంగా బ్యాంకులకు నోటీసులు జారీ చేశారు.