నా పని మాత్రమే ముఖ్యం.. అనవసర వ్యాఖ్యలపై తమన్నా కీలక వ్యాఖ్యలు

సీనియర్ నటుడు అన్నూ కపూర్ గతంలో ఓ టాక్‌ షోలో తమన్నా భాటియా గురించి చేసిన వ్యాఖ్యలు అప్పట్లో వివాదానికి దారితీశాయి. ‘స్త్రీ 2’ సినిమాలోని ‘ఆజ్ కీ రాత్’ పాటకు సంబంధించి ఆమె శరీర రంగుపై అన్నూ కపూర్ చేసిన వ్యాఖ్యలు చర్చనీయాంశమయ్యాయి. తాజాగా ఓ కార్యక్రమంలో పాల్గొన్న తమన్నా.. తన రూపురేఖలపై వచ్చే విమర్శలను ఎలా ఎదుర్కొంటారో వివరించారు. అనవసరమైన వ్యాఖ్యలను పట్టించుకోకుండా, తన వృత్తిపై దృష్టి పెట్టడమే ముఖ్యమని ఆమె స్పష్టం చేశారు.

ఒక కళాకారిణిగా ఇతరులు చెప్పే అభిప్రాయాలను వినడం ఎంత ముఖ్యమో, వాటిలో దేనిని స్వీకరించాలి, దేనిని పట్టించుకోకూడదో తెలుసుకోవడం కూడా అంతే ముఖ్యమని తమన్నా తెలిపారు. మహిళలు చిన్నచిన్న విమర్శలకు ప్రాధాన్యం ఇస్తూ ఉంటే జీవితంలో ముందుకు సాగలేరని అభిప్రాయపడ్డారు. అందుకే తాను ఇలాంటి వ్యాఖ్యలను పట్టించుకోనని, తన నటనతో పాటు తాను చేయాలనుకునే సినిమాలపైనే దృష్టి సారిస్తానని చెప్పారు. నటనను ఒక సేవగా భావిస్తూ నిజాయితీగా పనిచేయడానికి ప్రయత్నిస్తానని, తన పని ప్రేక్షకులకు చేరువ కావడానికి అదే కారణమని తమన్నా పేర్కొన్నారు.