వామిక గబ్బికి భారీ డిమాండ్!

బాలీవుడ్‌లో దాదాపు పదేళ్లుగా నటిస్తున్న వామిక గబ్బికి ఇప్పటివరకు సరైన స్థాయిలో థియేట్రికల్ బ్రేక్ రాలేదు. టెలివిజన్, ఓటీటీ, వెబ్ సిరీస్‌ల ద్వారా గుర్తింపు తెచ్చుకున్నప్పటికీ, ఆమె కెరీర్‌ను ఒక్కసారిగా మార్చే సినిమా మాత్రం దక్కలేదు. తాజాగా విడుదలైన ‘డిసి’ ఆ లోటును తీర్చినట్లు కనిపిస్తోంది. ఈ చిత్రంలో చంద్ర పాత్రలో నటించిన వామిక గబ్బి తన గ్లామర్‌తో పాటు నటనతోనూ ప్రేక్షకులను ఆకట్టుకున్నారు. సినిమా విజయంతో దక్షిణాది నుంచి ఆమెకు వరుస అవకాశాలు వస్తున్నట్లు సమాచారం. ముఖ్యంగా టాలీవుడ్‌లో ఆమెకు క్రేజీ ఆఫర్లు పెరిగినట్లు తెలుస్తోంది. ‘హనుమాన్’ విజయానంతరం ప్రశాంత్ వర్మ, రిషబ్ శెట్టి కాంబినేషన్‌లో రూపొందుతున్న ‘జై హనుమాన్’లో వామిక కీలక పాత్రలో నటించనున్నట్లు సమాచారం. ఈ చిత్రాన్ని టీ-సిరీస్ సమర్పణలో మైత్రి మూవీ మేకర్స్ నిర్మిస్తోంది.

‘జై హనుమాన్’లో రిషబ్ శెట్టి హనుమంతుడిగా, రానా దగ్గుబాటి అశ్వత్థామగా కనిపించనున్నారని ప్రచారం ఉంది. హైదరాబాద్‌లో ప్రారంభం కానున్న కొత్త షెడ్యూల్‌లో వామిక పాల్గొంటారని తెలుస్తోంది. మరోవైపు అడివి శేష్ హీరోగా తెరకెక్కుతున్న ‘G2’లోనూ ఆమె నటిస్తున్నారు. ఇందులో మహాలక్ష్మి అనే శక్తివంతమైన పాత్రలో కనిపించనున్నారు. ఇప్పటికే విడుదలైన ఆమె ఫస్ట్ లుక్‌కు మంచి స్పందన వచ్చింది. మలయాళంలో ‘టికీ టాకా’, తమిళంలో జయం రవితో ‘జీని’, ‘ఇరవ కాలం’ వంటి ప్రాజెక్టుల్లోనూ ఆమె భాగమవుతున్నారు. ఒకప్పుడు థియేట్రికల్ బ్రేక్ కోసం ఎదురుచూసిన వామిక గబ్బికి ఇప్పుడు దక్షిణాదిలో వరుస అవకాశాలు రావడం కెరీర్‌లో కీలక మలుపుగా మారింది. ముఖ్యంగా ‘జై హనుమాన్’, ‘G2’ చిత్రాలు ఆమెకు మరింత గుర్తింపు తీసుకొచ్చే అవకాశాలు కనిపిస్తున్నాయి.