‘ది ప్యారడైజ్’పై పరుచూరి రివ్యూ.. నాని నటనపై ప్రశంసలు

శ్రీకాంత్ ఓదెల దర్శకత్వంలో నాని ప్రధాన పాత్రలో తెరకెక్కిన ‘ది ప్యారడైజ్’ చిత్రంపై ప్రముఖ సినీ రచయిత పరుచూరి గోపాలకృష్ణ తన అభిప్రాయాన్ని వెల్లడించారు. ‘పరుచూరి పాఠాలు’ కార్యక్రమంలో భాగంగా సినిమా గురించి మాట్లాడుతూ.. నిజాం పాలన నుంచి ప్రజాస్వామ్య వ్యవస్థలోకి మారుతున్న కాలాన్ని దర్శకుడు అద్భుతంగా తెరపై ఆవిష్కరించారని ప్రశంసించారు. తెలంగాణలో నిజాం పాలనకు వ్యతిరేకంగా సాగిన పోరాటం, సామాన్య ప్రజలు ఎదుర్కొన్న అణచివేత, బానిసత్వాన్ని సినిమాలో బలంగా చూపించారని పేర్కొన్నారు. నాని నటన అద్భుతంగా ఉందని, సినిమా ప్రారంభంలో గద్దర్‌ను చూపించిన సన్నివేశం తనను భావోద్వేగానికి గురిచేసిందని తెలిపారు. ఈ పాత్రలో ఎన్టీఆర్, రామ్ చరణ్, అల్లు అర్జున్ వంటి అగ్రహీరోలు నటించి ఉంటే మరింత మంది ప్రేక్షకులు థియేటర్లకు వచ్చేవారేమోనని తన అభిప్రాయాన్ని పంచుకున్నారు.

మోహన్‌బాబు విలన్ పాత్రలో అద్భుతంగా నటించారని పరుచూరి కొనియాడారు. తన కుమారుడి మరణానికి ప్రతీకారం తీర్చుకునే సన్నివేశాల్లో ఆయన నటన ఆకట్టుకుందని, క్లైమాక్స్‌లో తనను తాను కాల్చుకుని చనిపోయే సన్నివేశం మంచి ముగింపునిచ్చిందని అన్నారు. సినిమాలో సంగీతం బాగుందని పేర్కొంటూనే, ఎడిటింగ్‌పై మరింత శ్రద్ధ తీసుకుని ఉంటే సినిమా ప్రభావం ఇంకాస్త పెరిగేదని అభిప్రాయపడ్డారు. తనికెళ్ల భరణి పాత్రకు కూడా చివర్లో ప్రత్యేకమైన ముగింపు ఉంటుందని ఆశించానని, అయితే అది జరగలేదని తెలిపారు. చిన్న చిన్న మార్పులు చేసి ఉంటే ‘ది ప్యారడైజ్’ మరింత మెరుగైన చిత్రంగా నిలిచేదని పరుచూరి అభిప్రాయపడ్డారు.