ముడిసరుకుల ధరల పెరుగుదల ఎఫెక్ట్.. కార్ల ధరలు పెంచనున్న టాటా మోటార్స్

ముడిసరుకుల ధరలు పెరగడంతో ఉత్పత్తి వ్యయం అధికమవుతున్న నేపథ్యంలో టాటా మోటార్స్‌ ప్యాసింజర్ వెహికల్స్‌ సంస్థ కార్ల ధరలను మరోసారి పెంచాలని యోచిస్తోంది. 2027 ఆర్థిక సంవత్సరం నాలుగో త్రైమాసికంలో ధరల పెంపు చేపట్టే అవకాశముందని కంపెనీ ఎండీ, సీఈవో శైలేష్ చంద్ర తెలిపారు. ఉక్కు, రబ్బరు, రాగి వంటి ముడిసరుకుల ధరలు పెరగడం వల్ల లాభాల మార్జిన్లపై ఒత్తిడి పెరుగుతోందని చెప్పారు. గతంలో చేపట్టిన ధరల పెంపుతో పోలిస్తే ఈసారి కొంత ఎక్కువగా ఉండే అవకాశం ఉందని పేర్కొన్నారు. తొలి అర్ధభాగంలో ముడిసరుకుల ధరల పెరుగుదల భారంలో దాదాపు 60 శాతాన్ని కంపెనీనే భరించాల్సి వచ్చిందని, దీంతో దేశీయ ప్యాసింజర్ వాహన వ్యాపారంలో ఈబీఐటీఏ మార్జిన్ 4 శాతానికి తగ్గిందని వివరించారు.

మూడో త్రైమాసికంలోనూ ఖర్చుల ఒత్తిడి కొనసాగవచ్చని, అయితే నాలుగో త్రైమాసికంలో ఖర్చుల నియంత్రణ చర్యలు, ధరల పెంపు ద్వారా లాభదాయకత మెరుగుపడుతుందని కంపెనీ ఆశిస్తోంది. భవిష్యత్తులో ముడిసరుకుల ధరలు తగ్గే అవకాశం ఉండటంతో ఆ భారాన్ని పూర్తిగా వినియోగదారులపై మోపకూడదని సంస్థ భావిస్తోంది. ఏయే ముడిసరుకుల ధరల పెరుగుదల శాశ్వతంగా కొనసాగుతుందో అంచనా వేసిన తర్వాతే తుది నిర్ణయం తీసుకోనుంది. మరోవైపు, వాహనాలకు డిమాండ్ స్థిరంగా కొనసాగుతోందని, 2027 ఆర్థిక సంవత్సరం రెండో త్రైమాసికంలో రెండు లక్షలకు పైగా వాహనాలను విక్రయించి దేశీయ మార్కెట్లో 14.3 శాతం వాటా సాధించినట్లు కంపెనీ తెలిపింది. డీలర్ల వద్ద వాహన నిల్వలు 30 రోజులకు మించకపోవడంతో సమీప భవిష్యత్తులో భారీ డిస్కౌంట్లు ఉండకపోవచ్చని శైలేష్ చంద్ర స్పష్టం చేశారు.