

అక్కినేని నాగచైతన్య హీరోగా, ‘విరూపాక్ష’ ఫేమ్ కార్తీక్ దండు దర్శకత్వంలో తెరకెక్కుతున్న చిత్రం ‘వృషకర్మ’. ఇందులో మీనాక్షి చౌదరి కథానాయికగా నటిస్తున్నారు. ఇప్పటికే షూటింగ్ పూర్తి చేసుకున్న ఈ సినిమా డిసెంబర్ 4న ప్రేక్షకుల ముందుకు రానుంది. విడుదలకు సమయం దగ్గరపడుతున్న నేపథ్యంలో తాజాగా ఓ ఇంటర్వ్యూలో పాల్గొన్న మీనాక్షి చౌదరి.. సినిమాలో తన పాత్రకు సంబంధించిన ఆసక్తికర విషయాలను వెల్లడించారు. ఇందులో తాను ‘దక్ష’ అనే పాత్రలో కనిపించనున్నట్లు తెలిపారు. దక్ష చరిత్ర విద్యార్థిని అని, పురావస్తు విభాగంలో పరిశోధనలు చేస్తూ థీసిస్ రాస్తుంటుందని వివరించారు. సీనియర్ నటుడు జయరామ్ పోషిస్తున్న ప్రొఫెసర్ రంగనాథన్ దగ్గర ఆమె పనిచేస్తుందని చెప్పారు. కథలో దక్ష పాత్రకు ఎంతో ప్రాధాన్యత ఉంటుందని ఆమె పేర్కొన్నారు.
దక్ష ప్రయాణం విద్యార్థి జీవితానికి దగ్గరగా ఉంటుందని మీనాక్షి తెలిపారు. తన లక్ష్యంతో పాటు తన ప్రొఫెసర్ ఆశయాన్ని కూడా నెరవేర్చేందుకు దక్ష చేసే ప్రయత్నాల చుట్టూ కథ సాగుతుందని వివరించారు. దక్ష చాలా పట్టుదల కలిగిన అమ్మాయి అని, తాను ఏం చేయాలనే విషయంలో స్పష్టమైన ఆలోచనతో ఉంటుందని చెప్పారు. తన మనసులోని మాటను నేరుగా చెప్పే వ్యక్తిత్వం ఆమె సొంతమని పేర్కొన్నారు. ఈ సినిమాలో కియారా ఖన్నా మరో కీలక పాత్రలో నటిస్తుండగా, ‘లాపతా లేడీస్’ ఫేమ్ స్పర్శ్ శ్రీవాస్తవ ప్రతినాయకుడిగా కనిపించనున్నారు. ఎస్వీసీసీ, సుకుమార్ రైటింగ్స్ బ్యానర్లపై బి.వి.ఎస్.ఎన్. ప్రసాద్, సుకుమార్ సంయుక్తంగా ఈ చిత్రాన్ని నిర్మిస్తున్నారు. మీనాక్షి వెల్లడించిన పాత్ర విశేషాలతో ‘వృషకర్మ’పై ప్రేక్షకుల్లో ఆసక్తి మరింత పెరిగింది.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!