బాక్సాఫీస్‌ను షేక్ చేస్తున్న ‘మండాడి’..

సూరి, సుహాస్ ప్రధాన పాత్రల్లో నటించిన ‘మండాడి’ సినిమా బాక్సాఫీస్ వద్ద దూసుకుపోతోంది. మతిమారన్ పుగళేంది దర్శకత్వంలో ఎల్రెడ్ కుమార్ నిర్మించిన ఈ చిత్రం తమిళ, తెలుగు భాషలతో పాటు విడుదలైన అన్ని ప్రాంతాల్లోనూ మంచి స్పందనను అందుకుంటోంది. ముఖ్యంగా తమిళనాడులో భారీ వసూళ్లతో సరికొత్త రికార్డులు సృష్టిస్తోంది. సూరి, సుహాస్‌తో పాటు మహిమా నంబియార్, సత్యరాజ్ నటన సినిమాకు ప్రధాన బలంగా నిలిచింది. బోట్ సీక్వెన్స్‌లు, హై-వోల్టేజ్ రేసింగ్ సన్నివేశాలు ప్రేక్షకులను ఆకట్టుకోగా, కథిర్ విజువల్స్, జీవీ ప్రకాష్ కుమార్ నేపథ్య సంగీతం, పీటర్ హెయిన్, దిలీప్ సుబ్బురాయన్, మహేష్ మాథ్యూ రూపొందించిన యాక్షన్ సన్నివేశాలు సినిమాకు మరింత గ్రాండియర్‌ను తీసుకొచ్చాయి.

తాజాగా తమిళనాడులోనే రూ.100 కోట్లకు పైగా గ్రాస్ వసూలు చేసిన ‘మండాడి’, ప్రపంచవ్యాప్తంగా రూ.150 కోట్లకు పైగా గ్రాస్ సాధించినట్లు మూవీకి సంబంధించిన వసూళ్ల వివరాలు చెబుతున్నాయి. రజనీకాంత్, వెట్రిమారన్ వంటి ప్రముఖుల ప్రశంసలు కూడా అందుకున్న ఈ చిత్రం సూరి, సుహాస్ కెరీర్‌లోనే అతిపెద్ద బ్లాక్‌బస్టర్‌గా నిలుస్తోంది. సముద్రతీర ప్రాంతంలోని మత్స్యకారుల జీవితం, వారి మధ్య విభేదాలు, స్నేహం, శత్రుత్వం, పగ, ప్రతీకారం, సంప్రదాయ పడవ పందేల నేపథ్యంలో కథ సాగుతుంది. ఒకప్పుడు ప్రాణ స్నేహితులైన ముత్తు కాళి, సాట్టా పులి బద్ధ శత్రువులుగా మారడం కథలో కీలక మలుపుగా నిలుస్తుంది. పరిస్థితుల కారణంగా హైదరాబాద్‌లో ఉంటున్న కాళి.. మల్లేశ్ అనే యువకుడి కారణంగా తన స్వగ్రామానికి తిరిగి రావడంతో అసలు కథ మొదలవుతుంది.