‘కొరియన్ కనకరాజు’: అమెరికాలో ఆధిపత్యం?

మెగా ప్రిన్స్ వరుణ్ తేజ్, రితికా నాయక్ జంటగా మేర్లపాక గాంధీ దర్శకత్వంలో రూపొందిన హారర్ కామెడీ ఎంటర్టైనర్ ‘కొరియన్ కనకరాజు’. చాలాకాలంగా ఎదురుచూస్తున్న కంబ్యాక్ హిట్‌ను ఈ సినిమాతో వరుణ్ తేజ్ అందుకున్నాడనే టాక్ వచ్చింది. విడుదల తర్వాత తెలుగు రాష్ట్రాల్లోనే కాకుండా అమెరికా మార్కెట్‌లో కూడా చిత్రానికి మంచి ఆదరణ లభిస్తున్నట్లు వాణిజ్య వర్గాలు చెబుతున్నాయి. ప్రేక్షకుల స్పందనకు అనుగుణంగా విదేశీ వసూళ్లు కూడా క్రమంగా పెరుగుతున్నాయి. ముఖ్యంగా నార్త్ అమెరికా మార్కెట్‌లో సినిమా దూకుడు కొనసాగుతోంది. ఈ వసూళ్లు వరుణ్ తేజ్‌కు అక్కడ ఉన్న మార్కెట్‌పై మరోసారి ఆసక్తిని పెంచుతున్నాయి. హారర్, కామెడీ అంశాల కలయిక ప్రేక్షకులను ఆకట్టుకోవడం కలెక్షన్లకు కలిసొచ్చినట్లు తెలుస్తోంది.

తాజా సమాచారం ప్రకారం ‘కొరియన్ కనకరాజు’ నార్త్ అమెరికాలో 6 లక్షల డాలర్స్ గ్రాస్ మార్క్‌ను దాటింది. ఇదే సమయంలో బ్లాక్‌బస్టర్ టాక్ సొంతం చేసుకున్న కోలీవుడ్ చిత్రం ‘డిసి’ రెండు వెర్షన్లలో విడుదలైనప్పటికీ అక్కడ ఇంకా హాఫ్ మిలియన్ మార్క్‌ను చేరుకోలేదని చెబుతున్నారు. దీంతో అమెరికా మార్కెట్‌లో వరుణ్ తేజ్ సినిమా ఆధిపత్యం చూపిస్తోందనే చర్చ మొదలైంది. థమన్ ఈ చిత్రానికి సంగీతం అందించగా, యూవీ క్రియేషన్స్ నిర్మాణ బాధ్యతలు చేపట్టింది. విడుదల తర్వాత మంచి స్పందన కొనసాగుతున్న నేపథ్యంలో ‘కొరియన్ కనకరాజు’ వసూళ్లు మరింత పెరుగుతాయా అన్నది ఆసక్తిగా మారింది. ముఖ్యంగా నార్త్ అమెరికాలో సినిమా దీర్ఘకాలికంగా ఎలాంటి ప్రదర్శన ఇస్తుందో చూడాలి.