కన్నడ నటుడు, నిర్మాత దిలీప్ రాజ్ కన్నుమూత!

కన్నడ సినీ పరిశ్రమలో విషాదం నెలకొంది. నటుడు, నిర్మాత దిలీప్ రాజ్ గుండెపోటుతో 47 ఏళ్ల వయసులో కన్నుమూశారు. బుధవారం తెల్లవారుజామున తన నివాసంలో ఒక్కసారిగా కుప్పకూలిపోవడంతో కుటుంబసభ్యులు ఆయన్ని ఆసుపత్రికి తరలించారు. అయితే అప్పటికే ఆయన మృతి చెందినట్లు వైద్యులు ధ్రువీకరించారు. దిలీప్ రాజ్ అకాల మరణంతో కన్నడ సినీ ప్రముఖులు, అభిమానులు తీవ్ర దిగ్భ్రాంతికి గురయ్యారు.

2007లో విడుదలైన మిలానా చిత్రంతో పునీత్ రాజ్‌కుమార్ సరసన నటించి దిలీప్ రాజ్ మంచి గుర్తింపు తెచ్చుకున్నారు. అనంతరం యూ టర్న్ చిత్రంతో పాటు పలు టీవీ సీరియళ్లలో నటించి ప్రేక్షకులకు చేరువయ్యారు. నటుడిగానే కాకుండా డీఆర్ క్రియేషన్స్ బ్యానర్‌పై పలు సీరియళ్లను నిర్మించారు. కొన్ని చిత్రాలకు డబ్బింగ్ ఆర్టిస్ట్‌గా కూడా సేవలందించారు. ఆయన కుటుంబానికి సినీ ప్రముఖులు, అభిమానులు సంతాపం తెలియజేస్తున్నారు.