రీతూ చౌదరితో బ్రేకప్‌పై డిమాన్‌ పవన్‌ ఎమోషనల్‌ పోస్ట్‌

బిగ్‌బాస్‌ షో ద్వారా మంచి గుర్తింపు తెచ్చుకున్న డిమాన్‌ పవన్‌, బుల్లితెర నటి రీతూ చౌదరి విడిపోయినట్లు ప్రకటించారు. గత కొంతకాలంగా వీరిద్దరూ ప్రేమలో ఉన్నారంటూ సోషల్‌ మీడియాలో ప్రచారం జరిగింది. పలు కార్యక్రమాల్లోనూ కలిసి కనిపించడంతో ఈ వార్తలకు మరింత ప్రచారం లభించింది. అయితే తాజాగా ఇన్‌స్టాగ్రామ్‌లో డిమాన్‌ పవన్‌ చేసిన ఎమోషనల్‌ పోస్ట్‌తో వీరి బంధానికి ముగింపు పలికిన విషయం వెల్లడైంది. తాను రీతూను ఉపయోగించుకున్నానని, ఆమె తనను ఉపయోగించుకుందని సోషల్‌ మీడియాలో జరుగుతున్న ప్రచారాలు బాధ కలిగిస్తున్నాయని ఆయన పేర్కొన్నారు.

బిగ్‌బాస్‌లో కనిపించే ప్రపంచం, బయట నిజ జీవితం వేర్వేరని పవన్‌ తన పోస్టులో తెలిపారు. తమ మధ్య చాలా నెలలుగా విభేదాలు ఉన్నాయని, వాటిని పరిష్కరించేందుకు పలుమార్లు ప్రయత్నించినప్పటికీ పరిస్థితులు అదుపు తప్పాయని చెప్పారు. ప్రశాంతత కోసం ఇకపై ఎవరి ప్రాజెక్టులను వారు విడిగా చేసుకోవాలని నిర్ణయించుకున్నట్లు వెల్లడించారు. రీతూ తనను వాట్సాప్‌లో బ్లాక్ చేసి, స్నాప్‌చాట్‌లో తొలగించిందని, ఆ తర్వాత తాను ఇన్‌స్టాగ్రామ్‌లో ఆమెను అన్‌ఫాలో చేశానని పవన్‌ వివరించారు. ఈ పోస్ట్‌ ప్రస్తుతం సోషల్‌ మీడియాలో చర్చనీయాంశంగా మారింది.