ఫోన్‌ ట్యాపింగ్‌ కేసులో కీలక పరిణామం.. కేసీఆర్‌ A1, కేటీఆర్‌ A2గా తుది చార్జిషీట్‌?

తెలంగాణలో సంచలనం సృష్టించిన ఫోన్‌ ట్యాపింగ్‌ కేసు దర్యాప్తు కీలక దశకు చేరుకుంది. ఈ కేసులో తుది చార్జిషీట్‌ దాఖలు చేసేందుకు ప్రత్యేక దర్యాప్తు బృందం (సిట్‌) అధికారులు సిద్ధమవుతున్నట్లు సమాచారం. నాటి ముఖ్యమంత్రి కల్వకుంట్ల చంద్రశేఖర్‌ రావును ఏ1గా, అప్పటి మంత్రి, ఆయన కుమారుడు కేటీఆర్‌ను ఏ2గా చేర్చేందుకు సిట్‌ అధికారులు సన్నాహాలు చేస్తున్నట్లు పోలీసు వర్గాలు వెల్లడించాయి. ఫోన్‌ ట్యాపింగ్‌కు అనుమతించినట్లు ఆరోపణలు ఎదుర్కొంటున్న ఉన్నతాధికారుల పేర్లు, వారి పాత్రను కూడా సాక్ష్యాధారాలతో తుది చార్జిషీట్‌లో వివరించనున్నట్లు తెలుస్తోంది. ఈ మేరకు సిట్‌ అధికారులు ఇప్పటికే ముఖ్యమంత్రి రేవంత్‌ రెడ్డికి దర్యాప్తు పురోగతిపై వివరించినట్లు సమాచారం. త్వరలోనే న్యాయస్థానంలో తుది చార్జిషీట్‌ దాఖలు చేయనున్నట్లు పోలీసు వర్గాలు చెబుతున్నాయి.

చట్టవిరుద్ధమని తెలిసినా ఫోన్‌ ట్యాపింగ్‌కు అనుమతించడం, తమకు అనుకూలంగా ఉన్న అధికారులకు ఎస్‌ఐబీ, ఇంటెలిజెన్స్‌ విభాగాల్లో కీలక బాధ్యతలు అప్పగించడం వెనుక కుట్ర ఉందన్న ఆరోపణలపై సిట్‌ దర్యాప్తు చేస్తోంది. ఆ అధికారుల ద్వారా ప్రజాప్రతినిధులు, జర్నలిస్టులు, న్యాయమూర్తులు, వ్యాపారవేత్తలు, సినీ ప్రముఖుల ఫోన్లను ట్యాప్‌ చేసినట్లు వచ్చిన ఆరోపణలకు సంబంధించి అధికారులు కీలక ఆధారాలు సేకరించినట్లు సమాచారం. ఈ వ్యవహారంలో ఎవరి పాత్ర ఎంతవరకు ఉందనే అంశాలను సాక్ష్యాలతో సహా తుది నివేదికలో పొందుపరచనున్నట్లు తెలుస్తోంది. అయితే, చార్జిషీట్‌ దాఖలయ్యే వరకు ఏ1, ఏ2గా పేర్లు చేర్చినట్లు వచ్చిన సమాచారం అధికారికంగా ధ్రువీకరించాల్సి ఉంది.