బియ్యం ధరల పెరుగుదలకు చెక్‌.. అక్రమ నిల్వలు, బ్లాక్‌ మార్కెటింగ్‌పై కేంద్రం, ఏపీ సర్కారు ఉక్కుపాదం

బియ్యం ధరల పెరుగుదల, అక్రమ నిల్వలు, బ్లాక్‌ మార్కెటింగ్‌ను అరికట్టేందుకు కేంద్ర, రాష్ట్ర ప్రభుత్వాలు చర్యలను ముమ్మరం చేశాయి. ధాన్యం, బియ్యం నిల్వలపై కేంద్ర ప్రభుత్వం నిఘా పెంచగా.. ధరలను నియంత్రించి వినియోగదారులపై అదనపు భారం పడకుండా చూసేందుకు ఆంధ్రప్రదేశ్‌ ప్రభుత్వం కఠిన చర్యలకు సిద్ధమైంది. వ్యాపారులు, రైస్‌ మిల్లర్లు తమ వద్ద ఉన్న బియ్యం నిల్వల వివరాలను ప్రతి శుక్రవారం వెల్లడించాలని కేంద్ర ఆహార మంత్రిత్వ శాఖ స్పష్టమైన ఆదేశాలు జారీ చేసింది. నిల్వల వివరాల్లో పారదర్శకత పెంచడంతో పాటు అక్రమ నిల్వలు, కృత్రిమ కొరత సృష్టించే ప్రయత్నాలను గుర్తించడం ఈ చర్యల ప్రధాన ఉద్దేశం.

మరోవైపు ఆంధ్రప్రదేశ్‌ సహా ఐదు రాష్ట్రాల్లో బియ్యం, ధాన్యం నిల్వలపై పరిమితులు విధించేందుకు కేంద్ర ప్రభుత్వం అనుమతించింది. ఇదే సమయంలో రాష్ట్రంలోని రైస్‌ మిల్లర్లు, వ్యాపారుల వద్ద ఉన్న పాత బియ్యం నిల్వలకు సైతం ప్రభుత్వం తాజాగా ఖరారు చేసిన ధరలే వర్తిస్తాయని పౌరసరఫరాల శాఖ స్పష్టం చేసింది. కేంద్ర, రాష్ట్ర ప్రభుత్వాల ఆదేశాలను ఉల్లంఘించే మిల్లర్లు, వ్యాపారులపై చర్యలు తీసుకునేందుకు కూటమి ప్రభుత్వం సిద్ధమవుతోంది. అక్రమ నిల్వలు, బ్లాక్‌ మార్కెటింగ్‌కు అడ్డుకట్ట వేయడంతో పాటు మార్కెట్లో ధరలను అదుపులో ఉంచి వినియోగదారులకు ఉపశమనం కల్పించడమే ఈ చర్యల లక్ష్యంగా ప్రభుత్వం భావిస్తోంది.