ప్రభాస్ క్రేజ్‌కు హద్దుల్లేవు...‘డార్లింగ్’ రీ-రిలీజ్ సెన్సేషన్!

టాలీవుడ్ అగ్రహీరో ప్రభాస్ నటించిన డార్లింగ్ రీ-రిలీజ్ బాక్సాఫీస్ వద్ద సంచలనం సృష్టిస్తోంది. 2010లో విడుదలైన ఈ రొమాంటిక్ కామెడీ చిత్రం, 16 ఏళ్ల తర్వాత 2026 ఏప్రిల్ 23న 4K వెర్షన్‌లో మళ్లీ ప్రేక్షకుల ముందుకు వచ్చింది. విడుదలైన మూడు రోజుల్లోనే ప్రపంచవ్యాప్తంగా రూ.10.44 కోట్ల గ్రాస్ వసూలు చేసి ట్రేడ్ వర్గాలను ఆశ్చర్యానికి గురి చేసింది. తొలి రోజే సుమారు రూ.7.59 కోట్లు వసూలు చేసి, తెలుగులో రీ-రిలీజ్ సినిమాల్లో రెండో అతిపెద్ద ఓపెనింగ్ సాధించింది.

ఈ చిత్రానికి ఎ. కరుణాకరన్ దర్శకత్వం వహించగా, కాజల్ అగర్వాల్ హీరోయిన్‌గా నటించారు. శ్రీ వెంకటేశ్వర సినీ చిత్ర పతాకంపై బి.వి.ఎస్.ఎన్. ప్రసాద్ నిర్మించిన ఈ చిత్రానికి జీవీ ప్రకాశ్ కుమార్ సంగీతం అందించారు. తెలుగు రాష్ట్రాలతో పాటు ఓవర్సీస్‌లోనూ ఈ చిత్రానికి అద్భుతమైన స్పందన లభిస్తోంది. థియేటర్ల వద్ద అభిమానులు కటౌట్లు, బాణాసంచాతో భారీగా సంబరాలు జరుపుకుంటున్నారు. ‘డార్లింగ్’ క్రేజ్ ఇప్పటికీ తగ్గలేదని ఈ వసూళ్లు స్పష్టంగా తెలియజేస్తున్నాయి.