మహారాష్ట్రలో నీట్ విద్యార్థిని ఆత్మహత్య..

మహారాష్ట్రలోని అహిల్యానగర్ జిల్లా జలాల్‌పూర్ గ్రామానికి చెందిన ఓ నీట్ విద్యార్థిని తన నివాసంలో ఆత్మహత్య చేసుకున్న ఘటన విషాదాన్ని మిగిల్చింది. కుటుంబ సభ్యులు బయటకు వెళ్లిన సమయంలో ఈ ఘటన జరిగినట్లు పోలీసులు తెలిపారు. అనంతరం ఇంటికి వచ్చిన బంధువులు ఆమెను గుర్తించి పోలీసులకు సమాచారం అందించగా, అధికారులు సంఘటనా స్థలానికి చేరుకుని కేసు నమోదు చేసి దర్యాప్తు ప్రారంభించారు.

దర్యాప్తులో విద్యార్థిని రాసినట్లు భావిస్తున్న ఓ లేఖను పోలీసులు స్వాధీనం చేసుకున్నారు. ప్రాథమిక సమాచారం ప్రకారం, నీట్ రీ-ఎగ్జామ్‌లో కటాఫ్ మార్కులు అందుకోలేకపోవడం వల్ల ఆమె తీవ్ర మనస్తాపానికి గురైనట్లు తెలుస్తోంది. వైద్య విద్యను అభ్యసించాలన్న తన లక్ష్యం నెరవేరదనే ఆందోళనలో ఉన్నట్లు పోలీసులు వెల్లడించారు. ఈ ఘటనకు సంబంధించిన అన్ని కోణాల్లో విచారణ కొనసాగుతోందని అధికారులు తెలిపారు.