విశాల్‌కు మరో షాక్?

రజినీకాంత్, కమల్ హాసన్ తర్వాత తెలుగులో కూడా తనకంటూ ప్రత్యేక మార్కెట్ ఏర్పరచుకున్న హీరో కోలీవుడ్‌ విశాల్. ఒకప్పుడు ఆయన యాక్షన్ సినిమాలకు ఆంధ్రప్రదేశ్, తెలంగాణలో మంచి ఓపెనింగ్స్ లభించేవి. అయితే కొంతకాలంగా వరుస పరాజయాలు రావడంతో తెలుగు మార్కెట్‌లో ఆయన స్థానం బలహీనపడింది. ఈ నేపథ్యంలో విశాల్ స్వీయ దర్శకత్వంలో తెరకెక్కించిన ‘మకుటం’ తాజాగా ప్రేక్షకుల ముందుకు వచ్చింది. భారీ అంచనాల మధ్య విడుదలైన ఈ చిత్రానికి తొలి రోజే ప్రతికూల స్పందన ఎదురైంది. తమిళనాడులోనూ ప్రారంభ వసూళ్లు ఆశించిన స్థాయిలో లేవని సమాచారం. తెలుగు రాష్ట్రాల్లో కొన్ని ప్రాంతాల్లో ప్రేక్షకులు లేక ప్రదర్శనలు రద్దయ్యే పరిస్థితి ఏర్పడినట్లు తెలుస్తోంది.

సినిమా ప్రచారం సరిగా లేకపోవడం, అదే సమయంలో సూర్య నటించిన ‘విశ్వనాథ్ అండ్ సన్స్’ పోటీగా నిలవడం ‘మకుటం’కు ప్రతికూలంగా మారినట్లు సినీ వర్గాలు చెబుతున్నాయి. ముఖ్యంగా కథనం బలహీనంగా ఉందనే విమర్శలు రావడంతో పాటు విశాల్ దర్శకత్వంపైనా ప్రేక్షకుల నుంచి తీవ్ర అసంతృప్తి వ్యక్తమవుతోంది. దీంతో ఈ సినిమా డిజాస్టర్ దిశగా వెళ్తున్నట్లు టాక్ వినిపిస్తోంది. ఒకప్పుడు తెలుగులో కనీసం తొలి రోజు వసూళ్లతో తన సత్తా చూపించిన విశాల్‌కు ఇప్పుడు థియేటర్లలో ప్రేక్షకులను రప్పించడం కూడా కష్టంగా మారడం చర్చనీయాంశంగా మారింది. వరుస ఫ్లాపుల ప్రభావం ఆయన మార్కెట్‌పై ఎంతగా పడిందో ‘మకుటం’ స్పందన మరోసారి స్పష్టం చేస్తోంది.