ఆంధ్ర కింగ్ తాలూకా అమెరికాలో ముందే ప్రీమియర్ – రామ్ పోతినేని తొలి యూఎస్‌ టూర్ రెడీ!

యంగ్ హీరో రామ్ పోతినేని నటించిన తాజా సినిమా ఆంధ్ర కింగ్ తాలూకా (AKT) విడుదలకు సిద్ధమైంది. మహేష్ బాబు పి దర్శకత్వంలో, మైత్రి మూవీ మేకర్స్ నిర్మాణంలో తెరకెక్కిన ఈ సినిమా నవంబర్ 28న థియేటర్లలో విడుదల కానుంది. అయితే అమెరికా ప్రేక్షకుల కోసం ప్రత్యేకంగా నవంబర్ 26 నుంచే ప్రీమియర్ షోలు ప్రారంభం కానున్నాయి. టీజర్‌, పాటలకు ఇప్పటికే అద్భుతమైన స్పందన లభించడంతో సినిమా మీద భారీ అంచనాలు ఏర్పడ్డాయి. ఈ ఉత్సాహాన్ని మరింత పెంచడానికి రామ్ ఈ సారి భారీ ప్రమోషన్ ప్లాన్ చేసుకున్నాడు. ముఖ్యంగా, తన కెరీర్‌లో ఇదే మొదటి సారి ఆయన అమెరికాలో సినిమా ప్రమోషన్ టూర్‌కి బయల్దేరుతున్నారు.

నవంబర్ 26 నుంచి 30 వరకు రామ్ యూఎస్‌లో వివిధ నగరాల్లో అభిమానులను కలుసుకుంటూ, ప్రత్యేక ప్రీమియర్ షోలకు హాజరుకానున్నారు. ఈ టూర్‌ ద్వారా అమెరికాలో ఆంధ్ర కింగ్ తాలూకా ఓపెనింగ్స్‌కి మంచి బూస్ట్‌ లభిస్తుందని టీమ్‌ నమ్మకంగా ఉంది. భాగ్యశ్రీ బోర్స్ హీరోయిన్‌గా నటించగా, కన్నడ స్టార్ ఉపేంద్ర కీలక పాత్రలో కనిపించనున్నారు. ప్రేమ, ఎమోషన్‌, స్టైల్‌ మిళితమైన ఈ సినిమా తెలుగు ప్రేక్షకులను ఆకట్టుకునేలా ఉందని యూనిట్‌ విశ్వసిస్తోంది.