బాంబు బెదిరింపుతో శంషాబాద్‌లో ఇండిగో విమానం ఎమర్జెన్సీ ల్యాండింగ్

కేరళలోని కన్నూర్ నుంచి హైదరాబాద్‌కు వస్తున్న ఇండిగో విమానంలో బాంబు ఉందంటూ వచ్చిన బెదిరింపుతో శంషాబాద్ విమానాశ్రయంలో తీవ్ర కలకలం రేగింది. గుర్తుతెలియని వ్యక్తి బాంబు ఉన్నట్లు ఓ కాగితంపై రాసి విమానం బాత్రూమ్‌లో ఉంచాడు. దీనిని గమనించిన ప్రయాణికులు వెంటనే విమాన సిబ్బందికి సమాచారం అందించారు. దీంతో అప్రమత్తమైన పైలట్ విమానాన్ని శంషాబాద్ ఎయిర్‌పోర్టులో అత్యవసరంగా ల్యాండ్ చేశారు.

అనంతరం ప్రయాణికులందరినీ సురక్షితంగా విమానం నుంచి కిందకు దించారు. బాంబు బెదిరింపు నేపథ్యంలో బాంబ్ స్క్వాడ్, సీఐఎస్‌ఎఫ్ బృందాలు విమానంలో క్షుణ్ణంగా తనిఖీలు నిర్వహించాయి. అయితే ఎలాంటి అనుమానాస్పద వస్తువులు కనిపించకపోవడంతో అధికారులు, ప్రయాణికులు ఊపిరి పీల్చుకున్నారు. ఈ బెదిరింపునకు పాల్పడిన వ్యక్తి ఎవరనే దానిపై అధికారులు ఆరా తీస్తున్నారు.