కేరళలో మళ్లీ నిపా వైరస్ కలకలం.. ఆరోగ్యశాఖ హై అలర్ట్

కేరళలో మరోసారి నిపా వైరస్ కలకలం రేపుతోంది. కోజికోడ్‌లోని ఫెరోక్ ప్రాంతానికి చెందిన 40 ఏళ్ల వ్యక్తికి నిర్వహించిన ప్రాథమిక పరీక్షల్లో నిపా వైరస్ సోకినట్లు తేలడంతో రాష్ట్ర ఆరోగ్యశాఖ అప్రమత్తమైంది. వైరస్ వ్యాప్తిని అరికట్టేందుకు అధికారులు వెంటనే పర్యవేక్షణ చర్యలను ప్రారంభించారు.

ప్రస్తుతం బాధితుడి ఆరోగ్య పరిస్థితి స్థిరంగా ఉందని వైద్యులు తెలిపారు. తుది నిర్ధారణ కోసం పుణేలోని నేషనల్ ఇన్‌స్టిట్యూట్ ఆఫ్ వైరాలజీ (NIV)కు నమూనాలు పంపించగా, అధికారిక నివేదిక కోసం ఎదురుచూస్తున్నారు. పరిస్థితిని నిశితంగా గమనిస్తున్న ఆరోగ్యశాఖ అవసరమైన అన్ని జాగ్రత్త చర్యలను అమలు చేస్తోంది.