తారా సుతారియా ఖాతాలోకి మరో క్రేజీ ఆఫర్

బాలీవుడ్‌ నటి తారా సుతారియా ‘టాక్సిక్‌’ సినిమాతో ఇటీవల ప్రేక్షకుల ముందుకు వచ్చింది. భారీ అంచనాల మధ్య విడుదలైన ఈ చిత్రం బాక్సాఫీస్‌ వద్ద ఆశించిన స్థాయిలో విజయం సాధించకపోయినా, తారా క్రేజ్‌ మాత్రం తగ్గలేదు. తాజాగా విక్కీ కౌశల్‌ హీరోగా నటిస్తున్న భారీ బడ్జెట్‌ పౌరాణిక చిత్రం ‘మహావతార్‌’లో ఆమె కథానాయికగా నటించనున్నట్లు సోషల్ మీడియాలో ప్రచారం జరుగుతోంది. ఈ పాత్ర కోసం పలువురు నటీమణుల పేర్లను పరిశీలించిన చిత్రబృందం చివరకు తారా సుతారియాను ఎంపిక చేసినట్లు సమాచారం.

విక్కీ కౌశల్‌కు దీటుగా నటించగల నటి కోసం మేకర్స్‌ అన్వేషించగా, తారా ఈ పాత్రకు సరైన ఎంపికగా భావించినట్లు తెలుస్తోంది. ‘స్త్రీ 2’ చిత్రంతో గుర్తింపు తెచ్చుకున్న అమర్‌ కౌశిక్‌ ఈ చిత్రానికి దర్శకత్వం వహిస్తున్నారు. ప్రముఖ నిర్మాణ సంస్థ మడాక్‌ ఫిల్మ్స్‌ నిర్మిస్తున్న ఈ సినిమా పరశురాముడి జీవిత కథ ఆధారంగా తెరకెక్కుతోంది. ప్రస్తుతం శరవేగంగా చిత్రీకరణ జరుగుతుండగా, క్రిస్మస్‌ సందర్భంగా సినిమాను ప్రేక్షకుల ముందుకు తీసుకురావాలని మేకర్స్‌ భావిస్తున్నట్లు సమాచారం.