రష్మికకు దిగ్గజ గాయని పాత్ర ఖరారు?

భారత రత్న, ప్రముఖ కర్ణాటక సంగీత విద్వాంసురాలు ఎం.ఎస్. సుబ్బులక్ష్మి జీవిత కథ ఆధారంగా రూపొందనున్న ప్రతిష్టాత్మక బయోపిక్‌పై సినీ వర్గాల్లో ఆసక్తి పెరుగుతోంది. ఈ చిత్రంలో ప్రధాన పాత్ర కోసం సాయిపల్లవిని మొదట పరిశీలించినట్లు సమాచారం. అయితే కాల్షీట్లకు సంబంధించిన సమస్యల కారణంగా ఆమె ఈ ప్రాజెక్ట్ నుంచి తప్పుకున్నట్లు ప్రచారం జరుగుతోంది. తాజాగా ఎం.ఎస్. సుబ్బులక్ష్మి పాత్రలో రష్మిక మందన్న నటించనున్నారనే వార్తలు వినిపిస్తున్నాయి. ఈ పాత్ర రష్మిక కెరీర్‌లోనే అత్యంత సవాలుతో కూడుకున్నదిగా మారనుంది. గాయని జీవితాన్ని తెరపై చూపించడంతో పాటు, ఆమె వ్యక్తిత్వం, హుందాతనం, అభినయాన్ని సహజంగా ప్రతిబింబించాల్సిన బాధ్యత రష్మికపై ఉండనుంది.

ఈ ప్రతిష్టాత్మక ప్రాజెక్ట్‌ను రాక్‌లైన్ వెంకటేష్, అల్లు అరవింద్, బన్నీ వాస్ సంయుక్తంగా నిర్మిస్తున్నట్లు తెలుస్తోంది. గౌతమ్ తిన్ననూరి దర్శకత్వం వహించనున్న ఈ బయోపిక్‌కు సంబంధించిన అధికారిక ప్రకటనను ఎం.ఎస్. సుబ్బులక్ష్మి జయంతి సందర్భంగా సెప్టెంబర్ 16న విడుదల చేయనున్నట్లు సమాచారం. అదే రోజున నటీనటులు, కథ, నిర్మాణ సంస్థలకు సంబంధించిన మరిన్ని వివరాలు వెల్లడయ్యే అవకాశం ఉంది. రష్మిక ఈ పాత్రలో పూర్తిగా ఒదిగిపోతే ఆమె నటనా ప్రయాణంలో ఇది ప్రత్యేకమైన చిత్రంగా నిలిచే అవకాశముంది. దీంతో ఈ బయోపిక్‌పై ప్రేక్షకులతో పాటు ఇండస్ట్రీలోనూ ఆసక్తి మరింత పెరుగుతోంది.