‘మూకుత్తి అమ్మన్ 2’ ఈవెంట్‌కు నయనతార డుమ్మా.. మళ్లీ మొదలైన చర్చ!

లేడీ సూపర్‌స్టార్ నయనతార సినిమా ప్రమోషన్లకు దూరంగా ఉంటారనే విమర్శలు చాలాకాలంగా ఉన్నాయి. అయితే ఇటీవల ‘మన శంకర వరప్రసాద్ గారు’ సినిమా ప్రమోషన్లలో పాల్గొనడంతో పాటు, ‘టాక్సిక్’ ట్రైలర్ లాంచ్ ఈవెంట్‌లోనూ సందడి చేశారు. దీంతో ఇకపై ఆమె సినిమా ప్రచార కార్యక్రమాల్లో చురుగ్గా పాల్గొంటారని అభిమానులు భావించారు. కానీ తాజాగా ‘మూకుత్తి అమ్మన్ 2’ (తెలుగులో ‘మహాశక్తి’) ప్రీ రిలీజ్ ఈవెంట్‌కు నయనతార హాజరుకాకపోవడంతో మరోసారి చర్చ మొదలైంది. ఈ కార్యక్రమానికి ఆమె రాకపోవడంతో అభిమానులు నిరాశ వ్యక్తం చేస్తున్నారు. అయితే షూటింగ్‌లో బిజీగా ఉండటం వల్లే ఈ వేడుకకు హాజరుకాలేకపోయారని చిత్రబృందం వెల్లడించింది. మరోవైపు, సినిమా చిత్రీకరణ సమయంలో నయనతార నాన్‌వెజ్‌కు దూరంగా ఉన్నారని దర్శకుడు సుందర్ సి తెలిపారు.

కోలీవుడ్‌లో భారీ బడ్జెట్‌తో తెరకెక్కుతున్న చిత్రాల్లో ‘మూకుత్తి అమ్మన్ 2’ ఒకటి. సుమారు రూ.100 కోట్ల బడ్జెట్‌తో రూపొందుతున్న ఈ సినిమాకు వేల్స్ ఇంటర్నేషనల్‌తో పాటు సుందర్ సి, నయనతార నిర్మాతలుగా వ్యవహరిస్తున్నారు. సుందర్ సి దర్శకత్వం వహిస్తున్న ఈ చిత్రంలో నయనతార ద్విపాత్రాభినయం చేయనుండగా, రెజీనా కీలక పాత్రలో కనిపించనున్నారు. నవంబర్ 6న ఈ సినిమా ప్రేక్షకుల ముందుకు రానుంది.