బాలీవుడ్ హీరోయిన్ల వ్యవహారశైలిపై విమర్శలు?

బాలీవుడ్‌కు చెందిన కొందరు హీరోయిన్ల వ్యవహారశైలిపై ఇప్పుడు సోషల్ మీడియాలో విమర్శలు వ్యక్తమవుతున్నాయి. జాన్వీ కపూర్‌తో పాటు తాజాగా రాధికా ఆప్టే పేర్లు కూడా ఈ చర్చలో వినిపిస్తున్నాయి. దక్షిణాది సినిమాలకు సంతకం చేసినప్పుడు, చిత్రీకరణ సమయంలో మాత్రం ఆ ప్రాజెక్ట్‌లో భాగం కావడం తన అదృష్టమని, జీవితంలో మర్చిపోలేని అవకాశమని ప్రశంసలు కురిపిస్తారని కొందరు నెటిజన్లు అంటున్నారు. ముఖ్యంగా తెలుగు సినిమాల్లో నటించే అవకాశం రావడంపై ఎంతో సంతోషంగా ఉన్నట్లు ఇంటర్వ్యూల్లో చెబుతారని గుర్తుచేస్తున్నారు. అయితే సినిమా పూర్తయ్యాక మాత్రం వారి మాటల్లో మార్పు కనిపిస్తోందని విమర్శిస్తున్నారు.

ముఖ్యంగా దక్షిణాది చిత్ర పరిశ్రమను, తెలుగు సినిమాలను ఎగతాళి చేస్తూ మాట్లాడటం ఎంతవరకు సమంజసమని ప్రశ్నిస్తున్నారు. తమ సినిమాల కోసం ఇక్కడి అవకాశాలను సంతోషంగా స్వీకరించి, తర్వాత అదే పరిశ్రమపై విమర్శలు చేయడం ద్వంద్వ వైఖరికి నిదర్శనమని సోషల్ మీడియాలో అభిప్రాయాలు వ్యక్తమవుతున్నాయి. అంతేకాదు, బాలీవుడ్ చిత్రాల్లో కొన్నిసార్లు కేవలం గ్లామర్ పాత్రలకే పరిమితమవుతున్న నటీమణులు, దక్షిణాది సినిమాల గురించి మాట్లాడేటప్పుడు మాత్రం విమర్శలకు దిగడం విడ్డూరంగా ఉందని నెటిజన్లు అంటున్నారు. ఒక పరిశ్రమలో అవకాశాలు పొందుతూ మరో పరిశ్రమను తక్కువ చేసి చూడటం సరైన పద్ధతి కాదని అభిప్రాయపడుతున్నారు. నటీనటులు అన్ని భాషల చిత్ర పరిశ్రమలను గౌరవించాలని సూచిస్తున్నారు.