తుఫాన్లతో నష్టపోయిన రైతులకు అండగా సీఎం చంద్రబాబు

అర్నబ్, మురసు తుఫాన్ల కారణంగా పంటలు నష్టపోయిన ఆంధ్రప్రదేశ్ రైతులను ఆదుకునేందుకు ముఖ్యమంత్రి చంద్రబాబు నాయుడు నిరంతరం ప్రయత్నాలు చేస్తున్నారు. వ్యవసాయ, ఉద్యాన పంటలు దెబ్బతిన్న రైతులకు తక్షణ సాయం అందించేందుకు కేంద్ర ప్రభుత్వంతో సంప్రదింపులు జరుపుతున్నారు. రైతుల సమస్యలను వివరిస్తూ కేంద్రానికి పలుమార్లు లేఖలు రాయడంతో పాటు కేంద్ర మంత్రులతో మాట్లాడుతున్నారు. కేంద్ర హోం మంత్రి అమిత్ షాతో ఇప్పటికే నాలుగుసార్లు చర్చించి, కేంద్ర బృందాలను రాష్ట్రానికి పంపించాలని కోరారు. అర్నబ్ తుఫాను కారణంగా రాష్ట్రానికి సుమారు రూ.4,563 కోట్ల నష్టం వాటిల్లినట్లు ప్రాథమిక నివేదికను కేంద్రానికి పంపించారు. ఈ తుఫాను ప్రభావంతో 781 గ్రామాలు తీవ్రంగా దెబ్బతిన్నాయని, 16 జిల్లాల్లో మూడు లక్షల హెక్టార్ల వ్యవసాయ పంటలు, 13.6 వేల హెక్టార్ల ఉద్యాన పంటలు నష్టపోయాయని నివేదికలో పేర్కొన్నారు. అలాగే 29 వేల విద్యుత్ స్తంభాలు, 7,981 కిలోమీటర్ల విద్యుత్ లైన్లు ధ్వంసమైనట్లు వెల్లడించారు. తక్షణ ఉపశమనం కోసం రూ.4,563 కోట్లు మంజూరు చేయాలని సీఎం కేంద్రాన్ని కోరారు.

మరోవైపు, మురసు తుఫాను కారణంగా ఏడు జిల్లాల్లోని 465 గ్రామాలు తీవ్రంగా ప్రభావితమైనట్లు కేంద్ర హోం మంత్రికి రాసిన లేఖలో ముఖ్యమంత్రి వివరించారు. 50,473 హెక్టార్లలో వరి పంట, 1,985 హెక్టార్లలో వాణిజ్య పంటలు దెబ్బతిన్నాయని, ప్రాథమికంగా రూ.343 కోట్ల మేర ఆస్తి నష్టం జరిగిందని తెలిపారు. రెండు తుఫాన్లతో నష్టపోయిన ప్రాంతాల్లో సాధారణ పరిస్థితులు నెలకొల్పడంతో పాటు రైతులకు తక్షణ ఆర్థిక సాయం అందించాలని కేంద్రాన్ని కోరారు. ఇదిలా ఉండగా, శ్రీలంకలోని కొలంబో పోర్టులో నిలిచిపోయిన మిర్చి ఎగుమతి కంటెయినర్ల సమస్యపైనా చంద్రబాబు స్పందించారు. చైనా, బంగ్లాదేశ్, ఇండోనేషియా, థాయ్‌లాండ్, సింగపూర్ తదితర దేశాలకు వెళ్లాల్సిన 150కి పైగా కంటెయినర్లు అక్కడే నిలిచిపోయాయని కేంద్ర వాణిజ్య శాఖ మంత్రి పీయూష్ గోయల్‌కు రాసిన లేఖలో పేర్కొన్నారు. తేమ శాతం పరిమితి ఎక్కువగా ఉందనే కారణంతో సరుకు నిలిచిపోవడంతో సుమారు రూ.60 కోట్ల విలువైన మిర్చి పోర్టులోనే ఉండిపోయిందని తెలిపారు. దీనివల్ల రైతులు, ఎగుమతిదారులు నష్టపోతున్నారని, ఆయా దేశాలతో సంప్రదింపులు జరిపి సరుకు ఎగుమతికి మార్గం సుగమం చేయాలని కేంద్రాన్ని కోరారు.