

అమెరికా అధ్యక్షుడు డొనాల్డ్ ట్రంప్, చైనా అధ్యక్షుడు షీ జిన్పింగ్, రష్యా అధ్యక్షుడు వ్లాదిమిర్ పుతిన్ అంతర్జాతీయ శాంతి, భద్రతకు సంబంధించిన కీలక అంశాలపై చర్చించారు. చైనాలోని షెంజెన్లో గురువారం జరిగిన ఈ త్రైపాక్షిక సమావేశం సుమారు 90 నిమిషాల పాటు సాగింది. అనంతరం ‘డిక్లరేషన్ టూవర్డ్స్ పీస్’ పేరుతో నాలుగు అంశాలతో కూడిన సంయుక్త ప్రకటన విడుదల చేశారు. ఐక్యరాజ్య సమితిలో సంస్కరణలు చేపట్టడం, శుద్ధి చేసిన పెట్రోలియం ఉత్పత్తుల సరఫరాను పెంచడం, అణ్వాయుధాల ముప్పును తగ్గించేందుకు చర్చలు జరపడం, అంతర్జాతీయ నేర న్యాయస్థానం (ఐసీసీ) తన అధికార పరిధిని దుర్వినియోగం చేయకూడదని పేర్కొనడం ఈ ప్రకటనలోని ప్రధాన అంశాలు. ప్రభుత్వాధినేతలు, అధికారులకు అంతర్జాతీయ చట్టాల ప్రకారం లభించే రక్షణను గౌరవించాలని కూడా ముగ్గురు నేతలు స్పష్టం చేశారు.
ఈ ప్రకటనలో ఐరాస భద్రతా మండలి సంస్కరణలపై ముగ్గురు నేతలు మద్దతు ప్రకటించడం భారత్ దీర్ఘకాలంగా చేస్తున్న డిమాండ్కు ప్రాధాన్యం కల్పించినప్పటికీ, భద్రతా మండలిలో భారత్కు శాశ్వత సభ్యత్వం కల్పించే అంశంపై ఎలాంటి స్పష్టత ఇవ్వలేదు. మరోవైపు, ఐసీసీపై చేసిన వ్యాఖ్యలు పుతిన్కు సంబంధించిన అరెస్టు వారెంట్ నేపథ్యంలో ప్రాధాన్యం సంతరించుకున్నాయి. అయితే సంయుక్త ప్రకటనలో ఉక్రెయిన్, ఇరాన్ యుద్ధాల ప్రస్తావన లేదు. సమావేశం నిర్మాణాత్మకంగా, ఫలవంతంగా సాగిందని జిన్పింగ్ పేర్కొనగా, ట్రంప్ పుతిన్తో తనకు మంచి సంబంధాలున్నాయని వ్యాఖ్యానించారు. ఉక్రెయిన్ యుద్ధానికి సంబంధించి పుతిన్ ఆ దేశం, ఐరోపా దేశాలపై విమర్శలు చేశారు.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!