కిమ్‌ జోంగ్‌ ఉన్‌తో భేటీకి ట్రంప్‌ రెడీ..

ఉత్తరకొరియా వద్ద 57 “చాలా శక్తిమంతమైన” అణ్వాయుధాలు ఉన్నాయని అమెరికా అధ్యక్షుడు డొనాల్డ్‌ ట్రంప్‌ పేర్కొన్నారు. ఈ ఏడాది ఉత్తరకొరియా అధినేత కిమ్‌ జోంగ్‌ ఉన్‌తో మరోసారి భేటీ అయ్యే అవకాశం ఉందని తెలిపారు. కిమ్‌తో తనకు మంచి సంబంధాలు ఉన్నాయని చెప్పిన ట్రంప్‌.. ఉత్తరకొరియాకు అణ్వాయుధాలు సమకూరడం ఎప్పుడూ జరగకూడదని వ్యాఖ్యానించారు. అలాగే ఇరాన్‌ అణ్వాయుధాలను పొందకుండా అడ్డుకోవడమే తన లక్ష్యమని స్పష్టం చేశారు. అయితే ఉత్తరకొరియా వద్ద 57 అణ్వాయుధాలు ఉన్నాయన్న సంఖ్య ట్రంప్‌ స్వయంగా వెల్లడించిన అంచనా మాత్రమేనని, అమెరికా ప్రభుత్వం బహిరంగంగా విడుదల చేసిన అధికారిక అంచనాల్లో ఈ నిర్దిష్ట సంఖ్య నిర్ధారించబడలేదని నివేదికలు పేర్కొంటున్నాయి.

ఇదిలా ఉండగా.. దక్షిణ కొరియాతో అమెరికా నిర్వహించే సంయుక్త సైనిక విన్యాసాలను గణనీయంగా తగ్గించాలని ట్రంప్‌ ఇటీవల పెంటగాన్‌ను ఆదేశించారు. ఈ విన్యాసాలు ఖర్చుతో కూడుకున్నవని, ఉత్తరకొరియాకు ప్రతికూల సంకేతాలు పంపుతున్నాయని ఆయన పేర్కొన్నారు. కిమ్‌తో తనకున్న సంబంధాలను కూడా ఈ నిర్ణయానికి కారణంగా ప్రస్తావించారు. అయితే కిమ్‌ జోంగ్‌ ఉన్‌ సోదరి, ఉత్తరకొరియా కీలక అధికారి కిమ్‌ యో జోంగ్‌ ట్రంప్‌ వ్యాఖ్యలకు భిన్నంగా స్పందించారు. ఇటీవల ట్రంప్‌, కిమ్‌ మధ్య నేరుగా సంప్రదింపులు జరిగిన విషయం తనకు తెలియదని ఆమె స్పష్టం చేశారు. అమెరికా-దక్షిణ కొరియా సైనిక విన్యాసాలను కూడా ఆమె విమర్శించారు. దీంతో ట్రంప్‌-కిమ్‌ మధ్య మరోసారి శిఖరాగ్ర భేటీ జరుగుతుందా అనే ఆసక్తి నెలకొంది.