

తిరుపతికి సమీపంలోని తిరుచానూరులో కొలువైన శ్రీ పద్మావతి అమ్మవారి వార్షిక కార్తీక బ్రహ్మోత్సవాలు డిసెంబర్ 6 నుంచి 14వ తేదీ వరకు వైభవంగా జరగనున్నాయి. తొమ్మిది రోజుల పాటు నిర్వహించనున్న ఈ ఉత్సవాలకు ఆంధ్రప్రదేశ్తో పాటు తమిళనాడు, కర్ణాటక రాష్ట్రాల నుంచి లక్షలాది మంది భక్తులు తరలివచ్చే అవకాశం ఉంది. భక్తులకు ఎలాంటి అసౌకర్యం కలగకుండా తిరుమల తిరుపతి దేవస్థానం (టీటీడీ) విస్తృత ఏర్పాట్లు చేపడుతోంది.
టీటీడీ జేఈవో డాక్టర్ ఏ. శరత్, సీవీఎస్ఓ మురళీకృష్ణ, తిరుపతి జిల్లా ఎస్పీ సుబ్బారాయుడితో కలిసి తిరుచానూరులో ఏర్పాట్లను పరిశీలించారు. వాహన మండపం, ఆలయ నాలుగు మాడ వీధులు, క్యూ లైన్లు, పద్మ పుష్కరిణిని సందర్శించి ఏర్పాట్లను సమీక్షించారు. పూడి రోడ్డులో భక్తుల కోసం నిర్మిస్తున్న షెల్టర్లు, జిల్లా పరిషత్ ఉన్నత పాఠశాల, నవజీవన్ ఆసుపత్రి సమీపంలో ఏర్పాటు చేయనున్న హోల్డింగ్ పాయింట్ల పనుల పురోగతిని అడిగి తెలుసుకున్నారు. టీటీడీ, పోలీసు, ఇతర ప్రభుత్వ విభాగాలు సమన్వయంతో పనిచేసి ఏర్పాట్లను సకాలంలో పూర్తి చేయాలని శరత్ అధికారులకు సూచించారు. వాహన సేవల సమయంలో, అలాగే మూలమూర్తి దర్శనానికి భక్తులకు ఎలాంటి ఇబ్బందులు కలగకుండా క్యూ లైన్లను పకడ్బందీగా నిర్వహించాలని ఆదేశించారు.
క్యూలైన్లలో వేచి ఉండే భక్తులకు ఎప్పటికప్పుడు మంచినీరు, అల్పాహారం అందించడంతో పాటు పారిశుధ్యం, వైద్య సేవలు, భద్రత, రవాణా సౌకర్యాలు కల్పించాలని సూచించారు. మరోవైపు, బ్రహ్మోత్సవాల సందర్భంగా టీటీడీ విజిలెన్స్, పోలీసు విభాగాలు సమన్వయంతో పటిష్టమైన భద్రతా చర్యలు చేపడుతున్నాయని ఎస్పీ సుబ్బారాయుడు తెలిపారు. ముఖ్యంగా పంచమి తీర్థం రోజున భక్తుల రద్దీని దృష్టిలో ఉంచుకుని ట్రాఫిక్ నియంత్రణ, వాహనాల పార్కింగ్, భక్తుల రాకపోకలకు ప్రత్యేక ప్రణాళిక రూపొందిస్తున్నట్లు వెల్లడించారు.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!