ప్రైవేటు పాఠశాలలకు కీలక ఆదేశాలు..

2026-27 విద్యా సంవత్సరంలో విద్యార్థుల నుంచి వసూలు చేసే ఫీజుల వివరాలను తరగతుల వారీగా తెలంగాణ పాఠశాల విద్యాశాఖ వెబ్‌సైట్‌లో అప్‌లోడ్‌ చేయాలని రాష్ట్రంలోని అన్ని ప్రైవేటు పాఠశాలలను పాఠశాల విద్యాశాఖ ఆదేశించింది. ఈ మేరకు పాఠశాల విద్యాశాఖ డైరెక్టర్‌ నవీన్‌ నికోలస్‌ శుక్రవారం ఉత్తర్వులు జారీ చేశారు. గతంలో ఆయా పాఠశాలల వెబ్‌సైట్లలో ఫీజుల వివరాలను అందుబాటులో ఉంచాలని ఆదేశించగా.. తాజాగా తెలంగాణ స్కూల్‌ ఎడ్యుకేషన్‌ వెబ్‌సైట్‌లోనే వివరాలను అప్‌లోడ్‌ చేసేందుకు ప్రత్యేక సదుపాయాన్ని కల్పించారు. తరగతుల వారీగా ఫీజు నిర్ణయానికి సంబంధించిన పత్రాలను పాఠశాల పాలకమండలి సభ్యుల సంతకాలతో అప్‌లోడ్‌ చేయాలని యాజమాన్యాలను ఆదేశించారు. వివరాలను అప్‌లోడ్‌ చేయని పాఠశాలలకు షోకాజ్‌ నోటీసులు జారీ చేయాలని ఆర్‌జేడీలు, డీఈఓలకు సూచించారు.

మరోవైపు పాఠశాల విద్యాశాఖ పలు ఆదేశాలను నిర్దిష్ట తుది గడువు లేకుండానే జారీ చేస్తుండటంతో వాటి అమలులో జాప్యం జరుగుతోందనే విమర్శలు ఉన్నాయి. 2024-25, 2025-26 విద్యా సంవత్సరాలకు సంబంధించిన పాఠశాలల ఆదాయ, వ్యయాల ఆడిట్‌ నివేదికలను సమర్పించాలని గత నెలలో ఆదేశించినప్పటికీ ఇప్పటివరకు పరిమిత సంఖ్యలో పాఠశాలలే వాటిని సమర్పించినట్లు సమాచారం. ప్రభుత్వ పాఠశాలల్లో ప్రీప్రైమరీ తరగతులకు ఉపాధ్యాయులు, ఆయాలు, ఇన్‌స్ట్రక్టర్ల నియామకాలకు సంబంధించిన ఆదేశాల్లోనూ స్పష్టమైన గడువు లేకపోవడంతో కొన్ని జిల్లాల్లో విద్యా సంవత్సరం ప్రారంభమై రెండు నెలలు గడిచినా నియామకాలు పూర్తికాలేదని తెలుస్తోంది. ఈ నేపథ్యంలో ప్రైవేటు పాఠశాలల ఫీజు వివరాలను ఆన్‌లైన్‌లో అందుబాటులో ఉంచడం ద్వారా పారదర్శకత పెంచడంతోపాటు, ఫీజుల వసూళ్లపై పర్యవేక్షణను బలోపేతం చేయాలని విద్యాశాఖ భావిస్తోంది.