కేదారి దంపతుల కుటుంబానికి సీఎం రేవంత్‌రెడ్డి అండ

తెలంగాణ మలిదశ ఉద్యమ సమయంలో అంకితభావంతో సేవలందించిన దివంగత లింగాల కేదారి, ఆయన భార్య దివంగత పుష్పలత కుటుంబానికి ముఖ్యమంత్రి సహాయ నిధి నుంచి రూ.10 లక్షల ఆర్థిక సాయం అందించాలని సీఎం రేవంత్‌రెడ్డి అధికారులను ఆదేశించారు. హనుమకొండలో సాధారణ హోటల్‌ నిర్వహించిన కేదారి దంపతులు ఉద్యమ సమయంలో విద్యార్థులు, కార్యకర్తలకు ఉచితంగా భోజనం, టిఫిన్లు, టీ అందించారు. ఆహారాన్ని వృథా చేయకూడదనే అంశంపై కూడా వారు ప్రజల్లో అవగాహన కల్పించారు.

హనుమకొండలోని శాంతినగర్‌, పోస్టల్‌ కాలనీకి చెందిన లింగాల కేదారి సెప్టెంబర్‌ 9న, ఆయన భార్య పుష్పలత సెప్టెంబర్‌ 10న మృతి చెందారు. వారి కుటుంబాన్ని ఆదుకునేందుకు సీఎం ఓఎస్డీ రూ.10 లక్షల సాయాన్ని మంజూరు చేశారు. మంజూరైన మొత్తాన్ని అర్హులైన చట్టబద్ధ వారసులు, కుటుంబ సభ్యులకు అందేలా చర్యలు తీసుకోవాలని హనుమకొండ కలెక్టర్‌ను ఆదేశించారు.