సోషల్ మీడియాకు ఐశ్వర్యలక్ష్మి గుడ్‌బై.. అసలు కారణం ఇదే!

కోలీవుడ్ బ్యూటీ ఐశ్వర్యలక్ష్మి సోషల్ మీడియాకు పూర్తిగా దూరం కావడం సినీ వర్గాల్లో చర్చనీయాంశంగా మారింది. కెరీర్ మంచి దశలో ఉన్న సమయంలో తీసుకున్న ఈ నిర్ణయం వెనుక కారణాలను ఆమె ఓ ఇంటర్వ్యూలో వెల్లడించారు. కొద్దిరోజుల విరామం కోసం ఈ నిర్ణయం తీసుకోలేదని స్పష్టం చేసిన ఐశ్వర్యలక్ష్మి.. ఆర్టిఫిషియల్ ఇంటెలిజెన్స్ (ఏఐ)ను కొందరు దుర్వినియోగం చేస్తూ సెలబ్రిటీల ఫొటోలు, వీడియోలను అసభ్యకరంగా ఎడిట్ చేసి ప్రచారం చేస్తున్న తీరుతో విసిగిపోయినట్లు తెలిపారు. ఈ డిజిటల్ ప్రపంచానికి దూరంగా ఉండటం వల్ల తన నిజ జీవితంలో ఎంతో స్వేచ్ఛ, ప్రశాంతత లభించిందని చెప్పారు.

ఈ నిర్ణయం వల్ల బ్రాండ్స్, ప్రమోషన్స్ కోల్పోయి ఆర్థికంగా భారీ నష్టం ఎదురయ్యే అవకాశం ఉందని తన మేనేజర్ హెచ్చరించినట్లు ఐశ్వర్యలక్ష్మి తెలిపారు. అయితే కోట్ల రూపాయల కంటే తనకు లభించిన మానసిక ప్రశాంతతే ముఖ్యమని భావించినట్లు చెప్పారు. గతంలో సోషల్ మీడియాలో వచ్చే ట్రోల్స్, ప్రతికూల వ్యాఖ్యలు తనపై తీవ్ర ప్రభావం చూపాయని వెల్లడించారు. వాటిని రోజూ చదవడం వల్ల ప్రపంచమంతా తనకు వ్యతిరేకంగా ఉందనే భావన కలిగి, తనను ఇష్టపడేవారే లేరనే నిరాశలోకి వెళ్లిపోయినట్లు ఐశ్వర్యలక్ష్మి పేర్కొన్నారు.