కాలుష్యరహిత దీపావళి ప్రచారానికి విరాట్ కోహ్లీ సేవలు తీసుకోండి.. సుప్రీంకోర్టు కీలక సూచన!

దీపావళి పండుగను బాణసంచా లేకుండా పర్యావరణహితంగా జరుపుకునేలా ప్రజల్లో అవగాహన పెంచాలని సుప్రీంకోర్టు సూచించింది. ఇందుకోసం టీమిండియా స్టార్ క్రికెటర్ విరాట్ కోహ్లీతో పాటు ప్రముఖ క్రీడాకారులు, సినీ ప్రముఖుల సేవలను వినియోగించుకోవాలని అభిప్రాయపడింది. బాణసంచా కాలుష్యంపై దాఖలైన పిటిషన్లను జస్టిస్ ఎం.ఎం. సుందరేశ్, జస్టిస్ ప్రసన్న బి. వరలే నేతృత్వంలోని ధర్మాసనం విచారించింది. ప్రతి ఏడాది కాలుష్య నియంత్రణకు ఆదేశాలు జారీ చేస్తున్నప్పటికీ ఉల్లంఘనలు కొనసాగుతున్నాయని, ఆశించిన ఫలితాలు రావడం లేదని వ్యాఖ్యానించింది. ప్రజల్లో అవగాహన కల్పించేందుకు ప్రముఖ క్రీడాకారులను ఎందుకు ఉపయోగించుకోవడం లేదని జస్టిస్ వరలే ప్రశ్నించగా, ఢిల్లీలో విరాట్ కోహ్లీ వంటి క్రికెటర్లతో ప్రత్యేక ప్రచార కార్యక్రమాలు నిర్వహించాలని జస్టిస్ సుందరేశ్ సూచించారు. దీపావళి అంటే దీపాల పండుగ అని, బాణసంచా లేకుండానే పండుగను ఆనందంగా జరుపుకోవాలనే సందేశాన్ని ప్రముఖుల ద్వారా ప్రజల్లోకి తీసుకెళ్లాలని పేర్కొన్నారు.

మరోవైపు బాణసంచా కాల్చడం వల్ల విషపూరిత వాయువులతో పాటు పీఎం2.5 కాలుష్య కణాలు విడుదలవుతాయని కోర్టు మిత్రురాలు అపరాజిత సింగ్ వివరించారు. ఇవి రక్తప్రవాహంలోకి చేరి శరీరంలోని కీలక అవయవాలపై ప్రభావం చూపుతాయని తెలిపారు. గ్రీన్ క్రాకర్స్ సైతం పూర్తిగా కాలుష్యరహితమైనవి కావని స్పష్టం చేశారు. బాణసంచా తయారీపై సంపూర్ణ నిషేధం విధించాలని పిటిషనర్లు కోరగా, తయారీదారుల తరఫు న్యాయవాది ఆ ప్రతిపాదనను వ్యతిరేకించారు. నిషేధం విధిస్తే అక్రమ విక్రయాలు, స్మగ్లింగ్ పెరిగే ప్రమాదం ఉందని వాదించారు. ఇదిలా ఉండగా, ఢిల్లీలోని 39 కాలుష్య పర్యవేక్షణ కేంద్రాల్లో కేవలం తొమ్మిది మాత్రమే పనిచేస్తుండటంపై సుప్రీంకోర్టు ఆందోళన వ్యక్తం చేసింది. కాలుష్య నియంత్రణకు తీసుకుంటున్న చర్యల వివరాలను సమర్పించాలని ప్రభుత్వాన్ని ఆదేశించింది.