హైదరాబాద్ ప్రయాణికులకు ఆర్టీసీ గుడ్‌న్యూస్..

హైదరాబాద్ నగర ప్రయాణికులకు తెలంగాణ రాష్ట్ర రోడ్డు రవాణా సంస్థ (టీజీఎస్‌ఆర్టీసీ) శుభవార్త అందించింది. ఇప్పటివరకు ప్రధానంగా విమానాశ్రయానికి వెళ్లే ప్రయాణికుల కోసం వినియోగిస్తున్న లగ్జరీ పుష్పక్ ఏసీ బస్సుల్లో ఇకపై సాధారణ ప్రజలు కూడా ప్రయాణించవచ్చు. నగరంలో ఈ బస్సులు నడిచే మార్గాల్లో ప్రయాణికులు తమకు అనుకూలమైన పాయింట్ వద్ద ఎక్కి, మరో పాయింట్ వద్ద దిగే సదుపాయాన్ని కల్పించారు. విమానాశ్రయానికి వెళ్లాల్సిన అవసరం లేకుండానే ఈ బస్సులను నగర ప్రయాణాలకు ఉపయోగించుకోవచ్చు.

ఈ ప్రయాణానికి కనీస ఛార్జీగా రూ.100ను ఆర్టీసీ నిర్ణయించింది. ట్రాఫిక్ రద్దీ, ఎండల నుంచి ఉపశమనం పొందుతూ సౌకర్యవంతమైన ఏసీ ప్రయాణం చేయాలనుకునే వారికి ఈ నిర్ణయం ఉపయోగపడనుంది. ఇప్పటివరకు ఎయిర్‌పోర్ట్ ప్రయాణాలకే పరిమితమైనట్లు భావించిన పుష్పక్ బస్సులు అందుబాటులోకి రావడంతో నగర ప్రయాణికులకు మరో లగ్జరీ రవాణా సదుపాయం అందుబాటులోకి వచ్చినట్లయింది.