తెలంగాణలో బియ్యం ధరలకు రెక్కలు..

తెలంగాణలో సన్న బియ్యం ధరలు గత నాలుగు నెలల్లో గణనీయంగా పెరిగాయి. గతంలో కిలో రూ.50–55 మధ్య లభించిన సన్న బియ్యం ధర ప్రస్తుతం రూ.65 నుంచి రూ.83.50 వరకు చేరింది. తక్కువ నాణ్యత కలిగిన రకాల ధరలు కూడా కిలోకు రూ.60 దాటగా, నూకల ధర రూ.20 నుంచి రూ.30కి పెరిగింది. ప్రముఖ రకాలైన జేఎస్ఆర్ ప్రీమియం కోలం కిలో రూ.83.50, జేఎస్ఆర్ రా రైస్ రూ.74.85, లలిత సోనా మసూరి రూ.71.33, కర్నూలు సోనా మసూరి రూ.70, హెచ్‌ఎంటీ రా రైస్ రూ.69 చొప్పున విక్రయమవుతున్నాయి. రిటైల్ మార్కెట్‌లో హెచ్‌ఎంటీ రా రైస్ ధర కిలో రూ.78 వరకు చేరడం గమనార్హం. పక్షం రోజుల క్రితం ఇదే రకం ధర రూ.70గా ఉంది.

బియ్యం ధరల పెరుగుదలకు పలు కారణాలు ఉన్నట్లు మార్కెట్ వర్గాలు చెబుతున్నాయి. ఎల్‌నినో ప్రభావంతో దిగుబడులు తగ్గవచ్చనే ఆందోళన, ఇతర రాష్ట్రాల నుంచి పెరుగుతున్న డిమాండ్, స్థానిక మార్కెట్లలో తగ్గుతున్న నిల్వలు ధరలపై ప్రభావం చూపుతున్నాయి. గత ఏడాది తెలంగాణలో 92.17 లక్షల ఎకరాల్లో వరి సాగు జరగగా, ఈసారి 78.23 లక్షల ఎకరాలకే పరిమితమైనట్లు నివేదిక పేర్కొంది. మహారాష్ట్ర, కర్ణాటక, ఆంధ్రప్రదేశ్ వ్యాపారులు సన్న ధాన్యాన్ని కొనుగోలు చేసి ముంబై, బెంగళూరు, చెన్నై వంటి నగరాలకు తరలిస్తున్నారు. మిల్లర్ల నగదు చెల్లింపు విధానం, ప్రభుత్వ నిల్వలపై ఆందోళనలు, కస్టమ్ మిల్లింగ్ రైస్ వ్యవహారాల్లో అక్రమాల ఆరోపణలు కూడా చర్చనీయాంశంగా మారాయి. విజిలెన్స్ తనిఖీల్లో సుమారు రూ.2,000 కోట్ల విలువైన ధాన్యం మాయమైనట్లు నివేదిక వెల్లడించింది. పెరుగుతున్న ధరలతో సామాన్య, మధ్యతరగతి కుటుంబాలపై భారం పెరుగుతుండటంతో సరఫరాను పెంచి ధరలను నియంత్రించేందుకు ప్రభుత్వం ఎలాంటి చర్యలు తీసుకుంటుందనే ఆసక్తి నెలకొంది.