సోహ్రాబుద్దీన్ కేసులో కీలక మలుపు.. నిర్దోషిత్వంపై సుప్రీంకోర్టు విచారణ!

సోహ్రాబుద్దీన్ షేక్ ఎన్‌కౌంటర్ కేసులో 22 మంది నిందితులను నిర్దోషులుగా విడుదల చేస్తూ బాంబే హైకోర్టు ఇచ్చిన తీర్పును సవాలు చేసిన పిటిషన్‌ను సుప్రీంకోర్టు పరిశీలించేందుకు అంగీకరించింది. సోహ్రాబుద్దీన్ సోదరుడు నయాబుద్దీన్ షేక్ ఈ పిటిషన్‌ను దాఖలు చేశారు. ప్రధాన న్యాయమూర్తి సూర్య కాంత్, జస్టిస్ జాయ్మాల్య బాగ్చి, జస్టిస్ వి. మహదేవన్‌లతో కూడిన ధర్మాసనం ఈ పిటిషన్‌పై నోటీసులు జారీ చేసింది.

విచారణ సందర్భంగా మొత్తం కేసు రికార్డును కోరడం లేదని, కీలకంగా భావించే మూడు లేదా నాలుగు సాక్షుల వాంగ్మూలాలను పరిశీలించాలనుకుంటున్నామని ధర్మాసనం తెలిపింది. ఈ కేసులో 92 మంది ప్రాసిక్యూషన్ సాక్షులు ప్రతికూలంగా మారిన అంశాన్ని జస్టిస్ జాయ్మాల్య బాగ్చి ప్రత్యేకంగా ప్రస్తావిస్తూ, విచారణ నిష్పక్షపాతంగా, న్యాయబద్ధంగా జరిగిందా అనే విషయాన్ని పరిశీలించాల్సిన అవసరం ఉందని అన్నారు. సోహ్రాబుద్దీన్ షేక్, ఆయన భార్య కౌసర్ బీ, సహచరుడు తులసీరామ్ ప్రజాపతి మరణాలకు సంబంధించిన ఈ కేసులో 22 మంది నిందితుల్లో 21 మంది పోలీసు సిబ్బంది ఉన్నారు. బాంబే హైకోర్టు మే 2026లో వారి నిర్దోషిత్వాన్ని సమర్థించింది.