సూపర్ ఇంటెలిజెన్స్ అత్యంత ప్రమాదకరంగా మారొచ్చు. – సాఫ్ట్‌బ్యాంక్ సీఈఓ మసయోషి సన్

ఆర్టిఫిషియల్ ఇంటెలిజెన్స్ (ఏఐ) రంగంలో అతిపెద్ద ఇన్వెస్టర్లలో ఒకరైన సాఫ్ట్‌బ్యాంక్ సీఈఓ మసయోషి సన్, ఏఐ భవిష్యత్తుపై కీలక హెచ్చరికలు జారీ చేశారు. సూపర్ ఇంటెలిజెన్స్ (ఎస్ఐ) తప్పుడు చేతుల్లోకి వెళితే అది "అత్యంత ప్రమాదకరంగా" మారే అవకాశం ఉందని ఆయన ఆందోళన వ్యక్తం చేశారు. జపాన్‌లోని క్యోటోలో జరిగిన సైన్స్ అండ్ టెక్నాలజీ ఫోరమ్ సదస్సులో ఆయన ఈ వ్యాఖ్యలు చేశారు.

ఈ సందర్భంగా మసయోషి సన్ మాట్లాడుతూ, ఏఐ సామర్థ్యం అనూహ్యంగా, వేగంగా పెరుగుతున్న తరుణంలో దేశాల మధ్య నమ్మకం, సహకారం అత్యంత అవసరమని నొక్కిచెప్పారు. "మానవుడు మానవుడితో పోరాడే విలాసవంతమైన సమయం మనకు ఇక లేదు. అంతకంటే పెద్ద ముప్పు అయిన శక్తివంతమైన ఏఐని నియంత్రించడానికి ప్రపంచ దేశాలన్నీ కలిసి పనిచేయాలి" అని ఆయన పిలుపునిచ్చారు. ఏఐ వల్ల మానవాళికి ఎంతో ప్రయోజనం ఉందని చెబుతూ వచ్చిన సన్, ఈసారి అందుకు భిన్నంగా ఆచితూచి మాట్లాడటం ప్రాధాన్యం సంతరించుకుంది. ఇటీవలి కాలంలో ఏఐ మోడళ్ల భద్రతకు సంబంధించి తలెత్తిన ఆందోళనల నేపథ్యంలో ఆయన వ్యాఖ్యలు ఈ మార్పును ప్రతిబింబిస్తున్నాయి. ఓపెన్‌ఏఐలో సాఫ్ట్‌బ్యాంక్ సుమారు 65 బిలియన్ డాలర్ల పెట్టుబడులు పెట్టిన విషయం తెలిసిందే.

ఇదే వేదికపై వైట్‌హౌస్ సైన్స్ అండ్ టెక్నాలజీ పాలసీ సలహాదారు మైఖేల్ క్రాట్సియోస్ మాట్లాడుతూ, శాస్త్రీయ పరిశోధనలను వేగవంతం చేసేందుకు ఏఐని ఉపయోగించుకోవడం లక్ష్యంగా అమెరికా నేతృత్వంలో ఒక కూటమిని ఏర్పాటు చేస్తున్నట్లు ప్రకటించారు. జపాన్, దక్షిణ కొరియా, యూకే, జర్మనీ, సింగపూర్, యూఏఈ సహా 17 దేశాలు ఇందులో భాగస్వాములుగా ఉన్నాయి. అయితే, ప్రారంభ జాబితాలో చైనాకు చోటు దక్కలేదు. ఈ కూటమి ద్వారా భవిష్యత్తులో ఆటోమేటెడ్ క్లౌడ్ ల్యాబొరేటరీలను ఏర్పాటు చేసి, రోబోటిక్ వ్యవస్థల ద్వారా వందలాది ప్రయోగాలను ఏకకాలంలో నిర్వహిస్తారని క్రాట్సియోస్ వివరించారు. దీనివల్ల ఏళ్ల తరబడి పట్టే పరిశోధనలు కేవలం కొన్ని గంటల్లోనే పూర్తవుతాయని తెలిపారు.

అనంతరం మసయోషి సన్ మాట్లాడుతూ, 2040 నాటికి ప్రపంచ జీడీపీలో కనీసం 20 శాతం వాటా (సుమారు 46 ట్రిలియన్ డాలర్లు) ఏఐ, లెర్నింగ్ మెషీన్‌ల ద్వారానే సమకూరుతుందని తన దీర్ఘకాలిక అంచనాను పునరుద్ఘాటించారు. ఏఐ పురోగతి మూడు దశల్లో ఉంటుందని, ప్రస్తుతం చాట్‌బాట్‌ల దశలో ఉన్నామని, తర్వాత బ్రౌజింగ్, కోడింగ్ దశకు, వచ్చే ఏడాది నుంచి రోబోట్లు, యంత్రాలతో భౌతిక పరస్పర చర్యల దశకు చేరుకుంటామని విశ్లేషించారు. ప్రస్తుత పరిణామాలు కేవలం ఆరంభం మాత్రమేనని ఆయన స్పష్టం చేశారు.