ఢిల్లీలో ‘సేవా సంకల్ప్ యాత్ర’ ముగింపు

ప్రధాని నరేంద్ర మోదీ 25 ఏళ్ల ప్రజాసేవా ప్రస్థానాన్ని పురస్కరించుకుని నిర్వహిస్తున్న ‘సేవా సంకల్ప్ యాత్ర’ ముగింపు కార్యక్రమం సందర్భంగా ఢిల్లీలో మాట్లాడారు. 2001 అక్టోబర్ 7న గుజరాత్ ముఖ్యమంత్రిగా బాధ్యతలు చేపట్టినప్పుడు తాను ఈ స్థాయికి చేరుకుంటానని ఊహించలేదని అన్నారు. ఇన్నేళ్లుగా ప్రజలకు సేవ చేసే అవకాశం కల్పించిన దేశ ప్రజలకు కృతజ్ఞతలు తెలిపారు. రాష్ట్రాల ఎన్నికలైనా, సాధారణ ఎన్నికలైనా ప్రజలు తనపై విశ్వాసం చూపించారని పేర్కొంటూ, ఎన్డీఏ మిత్రపక్షాలకు, దేశ ప్రజలందరికీ శిరస్సు వంచి నమస్కరిస్తున్నానని అన్నారు.

అంతకుముందు ఢిల్లీలోని శ్రీ వినాయక మందిరంలో ప్రత్యేక పూజలు నిర్వహించిన మోదీ.. దేశ ప్రజలందరి కోసం ప్రార్థనలు చేసినట్లు తెలిపారు. ప్రజలకు మరింతగా సేవ చేసేందుకు తనకు శక్తిని ప్రసాదించాలని భగవంతుడిని కోరుకున్నానన్నారు. ప్రజలే తనకు భగవంతుడి స్వరూపమని, దేశం తనకు ఎంతో ఇచ్చిందని, అందుకే దేశమే తనకు ఎల్లప్పుడూ ప్రథమ ప్రాధాన్యమని పేర్కొన్నారు. 25 ఏళ్ల ప్రజాసేవను పురస్కరించుకుని దేశవ్యాప్తంగా ‘సేవా సంకల్ప్’ కార్యక్రమాలు నిర్వహిస్తున్న నేపథ్యంలో ఈ వ్యాఖ్యలు చేశారు.