రాహుల్‌ గాంధీ ఆస్తుల కేసులో సుప్రీం కీలక ఆదేశాలు

కాంగ్రెస్‌ అగ్రనేత, లోక్‌సభ ప్రతిపక్ష నేత రాహుల్‌ గాంధీపై ఆదాయానికి మించిన ఆస్తుల ఆరోపణలకు సంబంధించిన కేసులో సుప్రీంకోర్టు కీలక ఆదేశాలు జారీ చేసింది. అలహాబాద్‌ హైకోర్టు ఆదేశాల ఆధారంగా సీబీఐ, ఈడీ ఎలాంటి నివేదికలను ఏ అధికార సంస్థ ముందు దాఖలు చేయవద్దని ఆదేశించింది. ఈ కేసులో రాహుల్‌ గాంధీకి దేశ, విదేశాల్లో ఉన్న ఆస్తులు ఆయనకు తెలిసిన ఆదాయ వనరులతో పోలిస్తే అధికంగా ఉన్నాయనే ఆరోపణలు ఉన్నాయి.

రాహుల్‌ గాంధీ పిటిషన్‌ను కేంద్రం వ్యతిరేకించగా, సుప్రీంకోర్టు కీలక ప్రశ్నలు సంధించింది. ఆరోపణలు అంత తీవ్రమైనవైతే కేంద్ర దర్యాప్తు సంస్థలు స్వయంగా ఎందుకు విచారణ ప్రారంభించలేదని ప్రశ్నించింది. కోర్టు ఆదేశాల కోసం ఎందుకు వేచి చూశారని నిలదీసింది. ప్రస్తుతం ఈ వ్యవహారంలో ముందుకు వెళ్లవద్దని అలహాబాద్‌ హైకోర్టుకు సూచించింది. ఆరోపణలపై ఇంకా తుది న్యాయ నిర్ధారణ జరగలేదు.