గణేశ్‌ నిమజ్జనం వేళ శాంతిభద్రతలకు విఘాతం కలిగిస్తే కఠిన చర్యలు: సజ్జనార్

గణేశ్‌ నిమజ్జనం, శోభాయాత్రల నేపథ్యంలో హైదరాబాద్‌ పోలీస్‌ కమిషనర్‌ సజ్జనార్‌ శాంతిభద్రతలపై కీలక హెచ్చరికలు జారీ చేశారు. నిమజ్జన కార్యక్రమాల సమయంలో శాంతిభద్రతలకు విఘాతం కలిగించే ఎలాంటి చర్యలను ఉపేక్షించబోమని స్పష్టం చేశారు. సోషల్‌ మీడియాలో పాత వీడియోలు, వదంతులు, అసత్య ప్రచారాల ద్వారా సమాజంలో ఉద్రిక్తతలు సృష్టించేందుకు ప్రయత్నించే వారిపై ప్రత్యేక నిఘా ఉంటుందని తెలిపారు. తప్పుడు సమాచారాన్ని ఎప్పటికప్పుడు ఫ్యాక్ట్‌ చెక్‌ చేసి వాస్తవాలను ప్రజలకు వెల్లడిస్తామని చెప్పారు.

ఉత్సవాల పేరుతో అసభ్యకర పాటలు, అశ్లీల నృత్యాలు లేదా ఇతర అభ్యంతరకర కార్యక్రమాలతో పండుగ పవిత్రతను దెబ్బతీస్తే కఠిన చర్యలు తప్పవని సజ్జనార్‌ హెచ్చరించారు. కార్యక్రమాల సమయంలో రికార్డ్‌ చేసిన దృశ్యాల ఆధారంగా అవసరమైతే తర్వాత కూడా చట్టపరమైన చర్యలు తీసుకుంటామని పేర్కొన్నారు. గణేశ్‌ ఉత్సవాలను భక్తిశ్రద్ధలతో, ప్రశాంత వాతావరణంలో నిర్వహించాలని నగర ప్రజలకు విజ్ఞప్తి చేశారు. పుకార్లను నమ్మకుండా, శాంతిభద్రతల పరిరక్షణలో పోలీసులకు సహకరించాలని కోరారు.