‘ప్యారడైజ్‌’ టికెట్‌ రేట్ల పెంపుపై పునఃసమీక్షించండి.. ప్రభుత్వానికి హైకోర్టు సూచన

ఈ నెల 24న విడుదల కానున్న ‘ది ప్యారడైజ్‌’ సినిమా టికెట్‌ ధరల పెంపునకు సంబంధించిన మెమోను పునఃసమీక్షించి, ఉపసంహరించే అంశాన్ని పరిశీలించాలని తెలంగాణ హైకోర్టు ప్రభుత్వానికి సూచించింది. జస్టిస్‌ ఎన్‌.వి.శ్రవణ్‌కుమార్‌ మంగళవారం ఈ వ్యవహారంపై విచారణ చేపట్టారు. టికెట్‌ ధరల పెంపునకు సంబంధించిన మెమోను చట్ట నిబంధనలకు విరుద్ధంగా జారీ చేశారని, ధరల పెంపునకు కారణాలు, సినిమా బడ్జెట్‌ వివరాలు వెల్లడించలేదని పిటిషనర్‌ తరఫు న్యాయవాది వాదించారు.

ప్రభుత్వ న్యాయవాది మహేశ్‌ రాజె ఇటీవల జారీ చేసిన జీవో ప్రకారమే మెమో ఇచ్చామని కోర్టుకు తెలిపారు. నిబంధనల ప్రకారం టికెట్‌ ధరల పెంపు కోరేవారు సినిమా విడుదలకు 90 రోజుల ముందే దరఖాస్తు చేసుకోవాలని న్యాయమూర్తి పేర్కొన్నారు. అలాంటి దరఖాస్తును ముందుగానే ప్రజల పరిశీలనకు ఉంచితే అభ్యంతరాలు తెలియజేసే అవకాశం ఉంటుందని తెలిపారు. విడుదలకు రెండు, మూడు రోజుల ముందు మెమోలు జారీ చేయడం సరికాదని వ్యాఖ్యానించారు. మెమోను పునఃసమీక్షించి ఉపసంహరించే అంశాన్ని హోంశాఖ ముఖ్య కార్యదర్శి పరిశీలించాలని సూచిస్తూ, విచారణను నాలుగు వారాలకు వాయిదా వేశారు.