శ్రీనివాస మంగాపురం సంచలనం!

సూపర్ స్టార్ కృష్ణ మనవడు, దివంగత రమేష్ బాబు తనయుడు జయకృష్ణ ఘట్టమనేని హీరోగా పరిచయమైన శ్రీనివాస మంగాపురం అరుదైన ఘనతను అందుకుంది. అజయ్ భూపతి దర్శకత్వంలో రూపొందిన ఈ రొమాంటిక్ యాక్షన్ డ్రామా జూలై 30న విడుదలైంది. బాక్సాఫీస్ వద్ద ఆశించిన ఫలితం రాకపోయినా గుంటూరు జిల్లా చిలకలూరిపేటలోని రామకృష్ణ థియేటర్‌లో ఏకంగా 100 రోజులు ప్రదర్శితమైంది. నవంబర్ 6న ఈ మైలురాయిని పూర్తి చేసుకుంది. ఓటీటీలోకి వచ్చిన తర్వాత కూడా థియేటర్‌లో ఈ రన్ కొనసాగడం విశేషంగా మారింది.

ప్రస్తుత రోజుల్లో సినిమాలు కొన్ని వారాలకే థియేటర్ల నుంచి వెళ్లిపోతున్న తరుణంలో డెబ్యూ హీరో చిత్రానికి ఇలాంటి ఆదరణ దక్కడం చర్చనీయాంశమైంది. కృష్ణ అభిమానులు జయకృష్ణ తొలి సినిమాకు గుర్తుండిపోయే విజయాన్ని అందించాలనే ఉద్దేశంతో ఈ ప్రదర్శనను కొనసాగించినట్లు తెలుస్తోంది. ఈ సందర్భంగా అభిమానులు భారీ కటౌట్లు ఏర్పాటు చేసి, బాణసంచా కాల్చి వేడుకలు నిర్వహించారు. రాషా తడానీ ఈ చిత్రంతో తెలుగు తెరకు పరిచయం కాగా, మోహన్ బాబు కీలక పాత్ర పోషించారు. పి. కిరణ్ నిర్మించిన ఈ చిత్రానికి జీవీ ప్రకాష్ కుమార్ సంగీతం అందించారు.